Алматыда Максим Қодаровтың «Куб» фильмі көрсетілді
Отандық режиссер Максим Қодаров көрермен назарына «Куб» қысқаметражды фильмін ұсынды. Көрсетілім режиссердің достары мен әріптестерінің, түсірілім тобының қатысуымен «Арман» кинотеатрында болып өтті.
«Куб» фильмі Максим Қодаровтың жетінші жұмысы болды. Туынды бір скрипкашы қыздың тағдырын баяндайды. Сценарий мен идея авторы – режиссердің өзі.
«Сценарий жазбас бұрын, өмірдегі өз орнын таба алмаған адамның образы менің ойымда көптен бері жүрген еді. Мен шығармашылық адамын зерттеуге үнемі қызығушылық танытатынмын. Олардың ішкі жан дүниесі қандай, арман-мақсаттарына жете алмаған кезде қандай күй кешеді екен? Осы сауалдар мазалап жүрді. Картинадағы кейіпкер белгілі бір жағдайларға байланысты орындалмай қалған армандарын санасының бір түкпіріне жасырып қойған»,-дейді режиссер.
Суреттер Максим Қодаровтың Facebook парақшасынан алынды
«Куб» фильмінде музыкалық мектепте еден жуушы болып жұмыс істейтін егде әйелдің тағдыры баяндалады. Оның өткен өмірін ешкім білмейді. Бірақ, кезінде болашағынан зор үміт күттірген скрипкашы әйел еді ғой. Алайда, кейіпкер өзінің салғырттығынан өнер әлемінен жырақтап кетіп, өмірде өз орнын таба алмады.
«Мен картинаның «ShortShortsFilmFestival&Asiа» атты Токиодағы ең ірі азиаттық кинофестивальдің байқау бағдарламасына енгенін қуана хабарлаймын. Оған қатысуға әлемнің 100 елінен 9 мыңға жуық өтініштер келіп түскенін айта кетейін. Ал байқауға 250 жұмыс қана шақырылған. Ол тізімге кіру мүмкіндігі 3%-ды құрады. Осы жобаға техникалық жағынан атсалысқандарға және қаржылай қолдау көрсеткендерге алғысымды білдірсем деймін»,-дейді продюсер Саин Ғабдуллин.
«Куб» қысқаметражды драмасының өндірісіне «Жеті ата» мен «Компания Кино» киностудиялары атсалысты.
пікірлер жоқ, бірінші болыңыз
Пікір қалдыру үшін