Сёдзо Итияма: «Қазақстан киносының мүмкіндігі жоғары»

• 2 Қазан, 2018
• BrodKaz
• 1 542
• 0

Алматы облысында «Барымташылар» көркем фильмінің түсірілімі аяқталды. Картина «Қазақфильм» киностудиясы және Tokyo New Cinema жапондық компаниясының біріккен жобасы болып табылады. Таспа режиссерлары – Ерлан Нұрмұхамбетов және Жапониялық қоюшы Лиса Такеба. Бұрын Такеши Китаномен жұмыс істеген фильм продюсерінің бірі Сёдзо Итияма «Бродвейге» коөнім идеясының қалай туғанын және «Барымташыларды» қандай болашақ күтіп тұрғанын айтып берді.

- Режиссер Ерлан Нұрмұхамбетовпен жолыңыз қалай түйісті?

- Мен бір кездері «Еуразия» кинофестиваліне келген болатынмын, сол жерде Ерлан Нұрмұхамбетовтың «Жаңғақ тал» фильмі көрсетілді. Сол кезде оның фильмі бас жүлдеге ие болды. Маған картина қатты ұнады, бірақ ол уақытта Ерланмен жеке әңгімелесуге мүмкіндік болмады. Былтыр Каннда Лиса Такеба Ерлан Нұрмұхамбетовтың жақсы жобасы бар екенін және соған қатысып көргісі келетінін айтқан еді. Сол кезде ол өз жұмысын Канндағы павильонда таныстырып жатқан, сол жақта барлығымыз кездесіп, бірігіп жасайтын жобаны талқыға салдық. «Барымташылар» - Жапония мен Қазақстанның коөнімі. Жапондар тарапынан Ерлан Нұрмұхамбетовпен бірге жұмыс істегенімізге қуанышты екенімізді айтқым келеді. Ол нәзік көзқарасы мен ерекше бағыты бар дарынды режиссер.

- «Барымташыларды» коммерциялық жоба ретінде қарастырасыз ба, әлде авторлық кино ретінде ме?

- Меніңше, біздің фильм авторлық киноға жақын. Сонымен қатар, картинада ауқымды аудиторияға қызықты болатын шынайы хикая бар. Фильмде барлығына түсінікті элементтер де жетерлік. Негізі, «Барымташылар» авторлық пен коммерциялық кино екеуінің ортасындағы дүние.

- Фильмнің айналымы Қазақстан мен Жапонияда жоспарланып отыр ма?

- Иә. Сондай-ақ, фильмді бүкіл посткеңестік аймақта көрсететін шығармыз. Қазір мықты пиар мамандармен серіктестік орнатып жатырмыз, солардың арқасында жапон кинотеатрларындағы тұсаукесерлер кестесі жасалды. Қазақстандық таспаны Жапония аумағында айналымға шығару өте қиын, бірақ мүмкін нәрсе. Сондықтан, жергілікті айналымшыларды қызықтыра білгенімізге қуаныштымыз. Жұмыс барысындағы негізгі рөлді жобаға отанында танымал актер Мирай Морияманың қатысуы атқарды.

- Картина халықаралық кинофестивальдерге қатыса ма?

- Әрине. Топқа уақыт жағынан қысым жасағымыз келмейді. Бірақ, түсірілімді аяқтағандықтан, монтаж жасап, Канн кинофестиваліне қатысуға өтініш беруге уақытымыз жеткілікті. Арнайы асығыс жасағымыз келмейді. Барлығы өз уақытымен бола жатар.

- Сіз Қазақстанда бірінші рет емессіз. Жапония мен Қазақстан киноөндірісіндегі қандай ұқсастықтар мен айырмашылықтарды байқадыңыз?

- Айырмашылық байқалады. Жапонияда бокс-офистің жартысы жергілікті киноөндірісті қолдауға кетеді, сондықтан жергілікті режиссерлардың түсірілімге қатысып, тәжірибе жинақтауға мүмкіндігі зор. Қазақстанда басқа жағдайды көрдім. Дегенмен, картина өндірісіндегі өсу байқалады. Елдер арасындағы ұқсастықтар да бар. Мысалы, Жапонияда коммерциялық табысты картиналардың көпшілігі түсірілім және орындау сапасы жағынан аса жақсы емес. Алайда, олар көрермен арасында сұранысқа ие. Сол фильмдер көбінесе ойын-сауықтық форматта түсірілген.

- Халықаралық жобаларда үлкен тәжірибесі бар продюсер ретінде қазақстандық кинематографқа не жетіспейді деп ойлайсыз?

- Менің ойымша, Қазақстан киносының мүмкіндігі жоғары. Өзіме классикалық қазақ киносының бағыты ұнайды. Әрине, жаңа режиссерлар, солармен бірге кинематографтағы жаңа көзқарас пен форматтардың пайда болатынын түсіну қажет. Дегенмен, қазақстандық классик кинематографшылардың ерекше бағыты сақталса екен деймін.

Әңгімелескен Әйгерім Қасқыр

• 2 Қазан, 2018
• BrodKaz
• 1 542
• 0