Дарья Александрова құпия түрде тұрмысқа шықты

1 Маусым, 2017
Мадина
1 253
0

Қазақстандық актриса Дарья Александрованың әйел мәртебесін иеленгеніне жарты жылға жуық уақыт болыпты. Белгілі болғандай, актриса өткен жылдың қараша айында актер Денис Литуевке («Джокер») тұрмысқа шыққан екен. Бірақ, өміріндегі ең маңызды күн туралы тіс жармауды жөн санапты. Ақыры, өзінің таңдаған жігіті мен тойы жайында Дарья comode.kz сайтына берген сұхбатында айтып берді:

«Жолдасым менен 13 жас үлкен. Біз мен бармен болып жұмыс істеген мекемеде таныстық. Ол сол кезде бір шараның үйлестірушісі болған. Ол маған бірден ұнап қалды. Танысуды алғаш мен бастағанымен, сол кезде қандай да бір қарым-қатынас жайында ойлаған жоқпын. Маған тек онымен әңгімелескен ұнайтын. Уақыт өте келе, сол жігіттен әкемнің, достарымның, тіпті құрбыларымның мінезін көре бастадым да, жан жарым болатын адам осы шығар деп топшыладым. Ол қарапайым жігіт, бірақ ол Менің Адамым».

Жас жігіт тұрмысқа шығу тұралы ұсынысты Дарьяға екі мәрте жасаған. Бірінші рет бойжеткен «иә» дегенімен, некелесуге бара қоймаған. Екінші және соңғы ұсыныс Санкт-Петербургте жасалды. Дарья ол жаққа диплом қорғау үшін барған болатын. Қос ғашық отанына келе салысымен, АХАЖ бөліміне өтініш берген.

Фото: comode.kz

Дарья мен Денистің көптен күткен тойлары 2016 жылы 8-қарашада өтті. Актрисаның айтуынша, жастар дүркіретіп той жасаудан гөрі, туыстары мен жақын достарының арасында қарапайым ғана салтанатты отырысты құп көрген.

Ал жастардың тойды және отбасылық өмірді неге жасырғысы келгендері туралы Дарья былай деп жауап берді:

«Жолдасым жеке өмірімізді жариялағанды аса ұната қоймайды. Біраз уақыттан бері оның пікірінің дұрыстығына көз жеткізгендеймін. Бақыт тыныштықты сүйеді - бұл шындық. Не дегенмен де, біз үшін әзірге солай болып тұр. Біз бөгде біреулердің көздері мен сөздерінен алыс жүргенді қалаймыз».

Актриса отбасылық өмірдің өзіне жақсы әсер етіп жатқандығын да жасырмады: ол бақытты, өз-өзіне сенімді, ақылды әрі нәзік бола түскен.

Превью: comode.kz