Ерден Тілемісов: ««MсMafia» хикаясының түсірілім тобы бізді қанішерлер-ассасиндер деп атады»
Отандық актер Ерден Тілемісов жақында ғана «MсMafia» хикаясының түсірілімінен еліне оралды. Оның қатысуындағы көпсериялы фильмнің түсірілімі 14-наурыз күні Лондонда басталып, үш аптаға созылған. Ерденмен бірге жобаға Мұрат Мұқашев пен Нүркен Тұматаев қатысты. Актерлардың жобаға қалай тап болғандары, қандай кейіпкерлерді сомдағаны және неден әсер алғандығы жөнінде бізге Ерден Тілемісов айтып берді.
«Барлығы хикаяның кастинг директоры саусағынан бал тамған қазақстандық скрипкашы Марат Бисенғалиевтің қызы, Британиядағы танымал актриса Арухан Галиеваға өтініш білдірген кезінен басталған. Жобаға физикалық жағынан қалыптасқан, орыс тілінде сөйлейтін азиаттық актерлар қажет болған екен. Осылайша, Арухан көмек сұрап әкесіне хабарласқан, ал Марат аға бұл туралы маған жазады. Мен оған сол үшін алғыс айтамын. Одан кейін студиямен келіссөздер жүргізіліп, тағы екі актер керек болды. Мен бірден Мұрат Мұқашев пен Нүркен Тұматаевты ұсындым»,-деп актер әңгімесін бастады.
«MсMafia» хикаясы – бұл «BBC» британ және «AMC» америкалық телеарналарының біріккен сегіз бөлімнен тұратын жобасы. Оны режиссер Джеймс Уоткинс түсірген. Оқиға ортасында Алекс Гудман – орыс мафия тобының мүшесі, ол қылмыстық әлемнен кетіп, кәсіппен айналысуды көздейді. Алайда, тағдыр қателіктерді кешірмейді. Алекс қайтадан қауіпті ойындардың ортасына сүңгіп кетеді.
«Біз картинада өзбен мафиясының өкілдерін сомдаймыз. Біздің сахналық есімдеріміз - Рустам, Тимур және Әлішер. Бастапқыда сценарийде Нүркеннің кейіпкерін «Алиша» деп атаған. Бірақ біз бұл қыздардың есімі екенін ұзақ дәлелдеп, ақыры «Алишерге» өзгерттік. Бірінші күннен-ақ хикаяны түсірушілер тобы бізді қанішерлер- ассасиндер деп атп жүрді. Бізге олардың тарапынан қатты назар аударылды. Бізді әрине бұл жағдай таң қалдырмай қоймады. Бірақ, бізге кейінірек кейіпкерлеріміздің хикаяда өзгеретінін хабарлады. Тағы бір таң қалдырғаны – түсірілім жұмысының ұйымдастырылуы. Таңымыз барлығы тәптіштеліп жазылған буклет оқудан басталды: бізге көліктің қашан келетіні, гримнің сағат қаншада болатыны, сол күні қандай көріністердің түсірілетіні туралы тізбектеп қойған. Тіпті, ол жерде ауа райының қандай болатыны да көрсетілген!», - деді Ерден Тілемісов.
Топтың нақтылығына қарамастан, отандасымыз ол жігіттермен жұмыс істеудің қызықты әрі жеңіл болғандығын жасырмады. Фильмге отандық актерлармен қатар, танымал тұлғалар: Джеймс Нортон, Алексей Серебряков, Мария Шукшина жіне т.б. атсалысқан.
Дегенмен, актерларымызға тәуекелге де баруға тура келді. Түсірілімнің алдында Ерденнің сырт бейнесін аздап өзгерткен. Яғни, оның әдемі қылып өсірген сақалын қырып тастаған. Бірақ, актер оған еш өкінбейді:
«Әрине, егер менің құзырымда болса, өз сақалымды сақтап қалар едім! Бірақ режиссер біз экран алдында сомдайтын актерлардың образын алдын ала ойластырып қойған. Бір қызығы, сақалым үшін гример-әйел қатты өкініш білдірген. Егер рөл көрермен үшін қызықты болса, режиссерге деген сенім берік болса, көп нәрседен бас тартуға болады. Қанша дегенмен, бұл біздің жұмысымыз ғой».
«MсMafia» телевизиялық хикаясының тұсаукесері 2018 жылдың басында болады деп жоспарланып отыр.
пікірлер жоқ, бірінші болыңыз
Пікір қалдыру үшін