Карловы Вары-2018: «Карпат арқылы» поляк жобасында көші-қон дағдарысына сараптама

4 Шілде, 2018
BrodKaz
985
0

Карловы Варыдағы «Батыстан Шығысқа қарай» байқау бағдарламасында Клара Кочанская мен Каспер Байон дуэтінің «Карпат арқылы» режиссерлік дебюті көрсетілді. Иран кинематографының классигі Аббас Киаростамидің (1997 жылы Каннда «Шие дәмі» фильмі үшін Алтын пальма бұтағының иегері атанған) жұмысынан шабыт алған бұл таспа Еуропадағы көші-қон дағдарысына сараптама жасауға тырысады. Мигранттар арқылы көші-қон мәселесін баяндайтын көптеген фильмдерге қарағанда, «Карпат арқылы» бұл тәжірибені орта таптағы ауқатты жұптың көзімен көрсетеді.

Юлия (Юлия Киёвская, «Махаббаттың құрама штаттары», «Қараңғылықта») және Петр (Петр Боровски, «Кво Вадис», «Ханымдар») – Польшадан шыққан дәулетті отбасы, олар кезекті керемет демалыстарын армандайды. Бірақ, Петрдің анасы оның әкесін босқындар лагерінен құтқару үшін құпия түрде ақша жинап жүргенін айтады. Юлия мен Петр анасының арманын орындау үшін, саяхатқа аттанады да, грек-македония шекарасын басып өтеді. Олар теледидар жаңалықтары арқылы ғана көріп жүрген Еуропаны өз көздерімен тамашалайды. Екеуі мақсаттарына жақындап қалды, дегенмен жайлы аймақтан шығу идеясының жақсы болғанына күмәнданып, ойлана бастайды.

«Карпат арқылы» фильмінің көп бөлігі импровизацияға құрылғанын ескерсек, көру кезінде деректі фильм мен шынайылыққа жақын драманың араласқанын байқауға болады. Кейіпкерлер саяхатқа аттанғанда, камера басты кейіпкерлердің артынан аңдиды. Авторлар дағдарысты талқылап жатқан жаңалықтар мен мәліметтер арқылы өздерінің барын сездіреді. Сонымен қатар, осы арқылы көрермендердің назарын басты кейіпкерден бөлек, босқындардың басынан өтіп жатқан шынайы жағдайларға бұрады. Картина авторлары Клара Кочанская мен Каспер Байон кейіпкерлер мен көрерменнің алдында өздерінің орта таптағы ыңғайлы жағдайынан қаншалықты қаша алатыны жайлы дилемма құрады.