Қазақстандық актриса есірткі сақтағаны үшін тұтқындалды
Актриса әрі сәнбике Әсемгүл Ибраева Астана аэропортында есірткімен тұтқындалды. Бойжеткен сот алдына шығып, өз кінәсін мойындады. Бұл туралы Zakon.kz порталы хабарлады.
Оқиға биылғы жылдың наурыз айында, Әсемгүл Ибраева Астанадан Алматыға ұшар кезде болған. Бойжеткеннің жүксалғышын тексеру барысында әйнек шылым түтігін, жұқалтыр қақпақ және салмағы 4 грамм болатын гашишті түйіншек табылды. Тұтқындалғаннан кейін актриса толықтай өз кінәсін мойындады және есірткіні Астананың Орталық саябағынан тауып алғанын, жеке қолдану мақсатында өзіне қалдырғанын түсіндірді.
Сот Ибраеваны Қылмыстық Кодексінің «Есiрткi, психотроптық заттарды, сол тектестерді, прекурсорларды өткізу мақсатынсыз заңсыз дайындау, қайта өңдеу, иемдену, сақтау, тасымалдау» 296 бабы 2 бөлімі бойынша кінәлі деп тапты және 100 сағатқа дейінгі мерзімге қоғамдық жұмысқа тарту жазасын кесті.
Әсемгүл Ибраева 2013 жылы Қытайдағы Tourism Queen Asia Халықаралық байқауында жеңіске жеткен соң, сәнбике ретінде танымал болды. Бойжеткен актриса ретінде «Киберқорғаушылар» хикаясына және «Екеуге арналған бап» комедиясына түскен.
пікірлер жоқ, бірінші болыңыз
Пікір қалдыру үшін