Аян Өтепберген ресейлік әнші Элджейдің бейнебаянына түсті

• 1 Тамыз, 2018
• BrodKaz
• 2 025
• 0

Желіде ресейлік әнші Элджейдің (Алексей Узенюк) «360°» әніне түсірілген бейнебаянының тұсауы кесілді. Музыкалық бейнебаянға отандық актер Аян Өтепберген түсті. Бейнебаян 1 миллионнан астам көрсетілімге және 20 мың пікірге ие болды.

Сюжет бойынша Аян Өтепберген – жапондық мафия, ол Элджей кейіпкерінің қызын ұрлап әкетеді. Сүйіктісін құтқару үшін жігіт көптеген кедергілерден өтеді. Бейнебаян автоматты атыс пен төбелестері бар голливудтық атыс-шабыс фильмдерінің бағытында түсірілген.

Түсірілімге қоюшы-оператор Мадияр Сатыбалдиев және Kazakh Union Action Team каскадерлары атсалысты. Төбелес қойылымымен Бауыржан Әбішев айналысты.

Актер Аян Өтепберген көрермендерге «Жаужүрек мың бала», «Рэкетир 2: Жаза» және «Қазақ хандығы» картиналарындағы рөлдері арқылы жақсы таныс. Сондай-ақ, актер «Тайталас» хикаясында басты рөлді сомдаған.

Еске сала кетсек, алдыңғы жолы Элджейдің «Suzuki» әніне түсірілген бейнебаяны жарыққа шыққан болатын, оның түсірілімі Алматыда өткен.

• 1 Тамыз, 2018
• BrodKaz
• 2 025
• 0