Баян Алагөзова режиссер Талғат Теменовтың айыптауына қарсы жауап берді
Жақында актриса әрі продюсер Баян Алагөзова плагиаттығы үшін айыпталды. «Махаббат бекеті» (1993) фильмінің режиссері Талғат Теменов продюсер «Тағдыр бекеті» картинасын түсіріп, авторлық құқығын бұзды деп айыптады. Баян Мақсатқызы тыс қалмай, айыптауына қарсы жауап берді.
Продюсердің айтуынша, «Махаббат бекеті» картинасының құқығы ҚР Мәдениет және спорт министрлігіне тиесілі екен, ол продюсерге «Тағдыр бекеті» жаңа фильмінде 1993 жылғы көріністер мен музыканы пайдалануға ресми түрде рұқсат берген.
«Құрметті Талғат Досымғалиұлы, мені ұрлықшы деп айыптап, көпшілік алдында маған кінә таққыңыз келген екен, сізге жауап қайтарудан басқа амалым қалмады. Біріншіден, өзіңіз 25 жыл бұрын сценарий авторы ретіндегі құқығыңызды беріп қойғансыз. «Махаббат бекеті» фильмі мемлекеттік бюджетке түсірілді, сіз төлемақыңызды алдыңыз, сіздің ешқандай да қарсылығыңыз болмауы керек, себебі картина қазір ҚР Мәдениет министрлігіне тиесілі, солардың ресми рұқсатымен мен түсірілімге кірістім», - деп түсіндіре кетті продюсер Инстаграмдағы жеке парақшасы арқылы.
Баян Мақсатқызы «Тағдыр бекетінің» ерекше сценарийге ие екенін, «Махаббат бекетіне» еш қатысы жоқтығын айта кетті. Сондай-ақ, ол бұрын қоюшы Талғат Теменовтың өзінен 50 мың доллар көлемінде сыйақы сұрағанын да жасырмады.
«Бұдан былай, мұндай мәлімдеме жасамас бұрын абай болыңыз, халық алдында мені ұрлықшы деп айыптағаныңыз үшін қажетті орындарға жүгініп, сізді жауапкершілікке тартуыма болады. Ескертілмегеніңізді алға тартып, алдаудың қажеті жоқ, сіз ақша тапқыңыз келіп отыр ғой, өйткені менен 50 000 доллар талап еткенсіз, менің куәгерлерім де бар, айыптауыңыз болмаса, бұл туралы тіс жармайтын едім. Кешіріңіз, бірақ мен картинаны мемлекеттік ақшаға түсіріп жатқан жоқпын, араныңызды толтыру үшін ақшаны оңды-солды шаша алмаймын. Қайда барсаңыз, онда барыңыз, бірақ барлығын еркектерше, тыныш әрі зиялы қауым секілді жасаңыз. Ресми түрде, мен барлық рұқсат етілген қағаздарды алдым, оның ішінде музыка авторы Төлеген Мұхамеджановтың да рұқсаты бар», - деп қосты продюсер.
Еске салсақ, «Тағдыр бекеті» фильмінің түсірілімі осы жылдың шілдесінде өткен болатын. Таспа Алматы облысында орналасқан Сарыөзек ауылында түсірілді.
пікірлер жоқ, бірінші болыңыз
Пікір қалдыру үшін