Баян Алагөзова қазақ қыздарының шетелдіктерге күйеуге шығуына қатысты пікір білдірді

26 Маусым, 2018
BrodKaz
786
0

Соңғы уақытта әлеуметтік желілерде қазақ қыздарының қытайлықтарға тұрмысқа шығуына қатысты әңгіме жиілеп кетті. Үйлену тойының шақыру билеттері ғаламторда пайда болса, сол тойды болдырмаудың амалы жасалынып жатыр. Продюсер Баян Алагөзова да тыс қалмай, ұлтаралық некеге қатысты пікірін білдірді.

«Өзге ұлттың жары атануға болмайды. Біздің жігіттердің шешімі осындай екен, олар бірігіп, басқалардың бағдырын шешуге кірісіп кетті. Осыған қатысты таңданысымды жасыра алмадым. Сонда қытайлардан миллиардтаған долларды қарызға алуға, техникаларын қолдануға, қытай мейрамханаларына баруға, киімдерін киюге, мұнай компанияларын басқартуға болады да, қытайды жақсы көріп қалуға болмай ма? Осылай ойлайтындардың махаббаттың не екенін білмейтіндігіне сенімдімін. Менің айтқым келгені, жүрек ұлтты, терінің түсін, ділін, дәстүрлерді таңдамайды, ғашық жан сол адамды бар болмысымен сүйеді. Жаһанданған заманда біреулердің қарым-қатынасына араласу әдепсіздік болып саналады, ал тәрбиелі адамдардың ойына мұндай ой кіріп те шықпайды», - деп жазды Instagram-ына Баян Алагөзова.

Сондай-ақ, продюсер қазақ жігіттерін әйелдерді сыйлауды, құқықтарын қорғауды үйренуге шақырды. Алайда, оның пікірінше Қазақстанда демократия тек еркектерге қатысты ғана жұмыс істейді екен.

«Біз азаматтардың тәуелсіздігі алдыңғы қатарда тұратын демократиялы елде өмір сүреміз деп аттандаймыз. Тәуелсіздік ер азаматтарға ғана тән сияқты, еркектерге бірнеше әйел алуға, кімге үйленгісі келетінін шешуге, балағаттауға, ұруға, басқаруға, бұйрық беруге, тыйым салуға немесе рұқсат беруге болады. Бұл тізімді әлі де жалғастыра аламыз... Мен шынында қорқамын, Құдай сақтасын, ертең менің қызым шетелдік азаматқа ғашық болып қалса, оған қоғамның қатысы қанша? Ал егер ұлтты басқалардан биік қоятын болсақ, онда ең алдымен өзіміз тіс пастасын өндіруді үйренейік, ұшақтар мен көліктер, телефондар жайлы айтпай-ақ қояйын... Қытайлардың «ЖАРТЫ АСПАН ӘЙЕЛДЕРГЕ» деген тамаша сөзі бар», - деп, өз ойын аяқтады Баян Мақсатқызы.

Еске салсақ, продюсер әйелдер құқығын қорғайтын қор ашуды жоспарлап жүр.

Превью: Баян Алагөзованың жеке Instagram парақшасынан