Бибігүл Ақтан Еуропа кино апталығына барды
Алматыда Еуропа кино апталығы жалғасып жатыр. Көрсетілімдер «Арман» киноорталығында өтуде, зал кино өнерін сүйетін көрерменге лық толы. Фестиваль қонақтарының арасында Бибігүл Ақтан да бар. Отандық актриса «Күнді кіргіз» француз фильмін тамашалап, алған әсерімен «Бродвей» оқырмандарымен бөлісті.
Дарынды актриса Жюльет Биноштың қатысуымен түсірілген «Күнді кіргіз» картинасы ажырасқан соң, өз-өзіне келуге тырысқан суретші жайлы баяндайды. Әйел 50 жаста, ол шынында да өмірде өзіне не керектігін және жанында қандай жігіттің болғаны жөн екенін білмейді.
«Ең бірінші Жюльет Биноштың керемет ойнау шеберлігін айтқым келеді, жалпы бүкіл фильм соның ойынына тәуелді. Картина диалогқа құрылған, ырғақ аздау, сондықтан актерлардың ойынына басты назар аударылады. Фильм әлеуметтік мәселені қозғау арқылы ұтып отыр, яғни ересек шақта адамдарға қарттықты бірге өткізетін жұпты табудың қиындай түсетінін жақсы көрсеткен. Әрине, басты кейіпкерді ерлерді жиі ауыстыратыны үшін кінәлауға да болады. Бірақ, оны да түсінуіміз керек. Ол – өмірлік серігін іздеп жүрген әйел. Біршама жасқа жеткен адамдарға жеке өмірін қайта құру қиынға соғып жатады. Бұл тақырып Еуропада ғана емес, Қазақстанда да өзекті болып отыр. Фильм осындай жағдайды бастан кешіп жатқандар үшін пайдалы болады деп ойлаймын. Олар көрсетілім барысында өздеріне қажетті жауапты естіп, қорытынды жасайтын шығар. Жалпы, бұл таспаны көре отырып, ләззат алдым. Соңғы уақытта кинотеатрлардан еш мағынасы жоқ коммерциялық киноларды жиі көрсетіп кетті. Сондықтан, «Күнді кіргіз» таспасы мен үшін таза ауамен тыныстағанмен бірдей», - деді Бибігүл Ақтан.
Еуропа кино апталығы 24 мамырда басталды. Көрсетілім аясында британдық әнші Матанги Арулпрагасам жайлы баяндайтын «M.I.A» фильмі және Берлин кинофестивалінің жүлдегері «Қатарлар арасында» мелодрамасы ұсынылды. Апталық «Юпитер серігі» фантастикалық драмасымен аяқталады.
Еске сала кетсек, фестиваль Британ Кеңесімен, Қазақстан Гёте-Институтымен, Алматы Француз Альянсымен, Венгрияның Бас елшілігімен және EUNIC Еуропа мәдени институттарының қауымдастығымен ұйымдастырылды. Көрсетілім кураторы - Clique Fest.
1 пікір
Пікір қалдыру үшін
Мырзахмет
11 шілде 2018, 21:39Лучшая во всей красе и всегда всюду