Қазақстандық бойжеткен жапон режиссерінің фильміне түсті

5 Маусым, 2018
BrodKaz
1 023
0

Қазақстандық продюсер Надира Ахонова жапон режиссері Масару Ясокаваның қысқаметражды фильміне түсті. Картина түсірілімі 71-ші Канн кинофестивалінде өтті, ол жаққа бойжеткен Short Film Corner (Court Métrage) бағдарламасында «Seven Rounds» жобасын таныстыруға келген.

Жапондық картина психологиялық триллер жанрында түсірілген. Сюжетте екі белгісіз бойжеткен бір ғимаратта қамалып отырады, екеуінің де аяқтары мен қолдары байлаулы. Олар бұл жаққа қалайша бірге тап болғандарын және мұның артында кімнің тұрғанын, бір-біріне сенуге болатыны-болмайтынын түсінулері тиіс. Фильм қазақ және жапон тілдерінде түсірілді.

«Кинофестиваль басталмай тұрып, маған осы фильмге түсуді ұсынған. Продюсермен жұмыс істеп жүріп, ылғи камера сыртында жүрдім. Мен өзімді баяғыдан бері актриса ретінде сынап көргім келетін, ақыры жақсы шыққан сияқты. Жалпы, түсірілім барысынан үлкен ләззат алдым. Фильмде қалыпты желілік баяндау жоқ. Түсірілім кезінде ылғи тәжірибе жасадық, новаторлық бағыттар мен импровизация қолдандық. Менің кейіпкерім – бөтен елде жүрген жас қазақ қызы Сәбина. Ол ана тілінен басқа, жергілікті және басқа тілдерді білмейді», - деді жоба жайлы Надира.

Надира Ахонова – «Genetic Passport» деректі фильмі үшін «Эмми» жүлдесін иеленген продюсер. Оның қоржынында британдық режиссер Энтони Баттстың «Ақырзаманнан кейін», Vice Media-мен бірігіп түсірген «Russian Road Trip», «3riple B», «Reparation», «From the Margins», «Seven Rounds» жобалары бар. Одан басқа, ол Issues of Faith - The Spiritual Ambassador және HBO World Championship Boxing GGG-мен жұмыс істеген. Бүгінде продюсер Three Flames Pictures американдық кинокомпаниясымен танымал голливуддық продюсерлер Фред Карузо мен Тревор Дойлмен бірге жұмыс істеген.