Нұртас Адамбай «Самая вышка» әнінің трек лицензиясын сатып алды
Нұртас Адамбай танымал «Самая вышка» әнінің трек құқығын ресми түрде сатып алды. Алдыңғы жолы «Мен – күйеу жігітпін» фильмінің саундтрегі болып келетін аталмыш шығарманың плагиат екені хабарланған еді. Продюсер әрі режиссер Нұртас Адамбайдың өзі авторлық құқықтың бұзылғаны жайлы Nurtas Production компаниясының білмегенін айтты.
Адамбай құқықты сатып алғаны туралы Instagram арқылы хабарлады.
«Бізге қазақтарға, қазақстандықтарға, мұсылмандарға, қарапайым халыққа әсіресе, Рамазан айында қандай да бір шиеленіске түсуге болмайды! Жасым үлкен болғандықтан, жас жігіттер Райымбек пен Артурмен болған «Самая вышка» әнінің авторлық құқығына қатысты жағдайды шештім. Жасы үлкен адам кез-келген істе жауапкершілікті сезінеді деп ойлаймын.
Біздің бар күшіміз, тобымыздың еңбегі, жігіттердің талпынысы, көрермендер мен тыңдаушылардың қалауының арқасында арамызда қандай да бір келіспеушіліктің орын алуы дұрыс емес. Сондықтан, көрермендердің және жігіттердің көңілін түсірмеу үшін аталмыш трек/биттің толыққанды лицензиясын сатып алып, Raim&Artur-ға сыйлауды жөн санадым. Бұл лицензия толық болып саналады, яғни заң бұзылмайды. Сол себепті, ешқандай авторлық құқық бұзылмағандықтан, бейнебаянды @gakkutv арнасының YouTube желісінен өшірмейтін болдық.
Барлығын қасиетті Рамазан айымен құттықтаймын! Үйлерімізде бейбітшілік орнасын! Біреулер пікір ретінде маған: «сіз бастапқыда оларға қолдау білдірдіңіз ғой, қазір де қолдасаңызшы», - деп жазған еді. Сол адам дұрыс айтты деп ойлаймын», - деп жазды продюсер.
«Самая вышка» әнін жазған Raim&Artur тобы минусы мен аранжировкасын Youtube.com сайтынан алғандарын жеткізген. Бұл туралы жігіттер Tengrinews.kz сайтында айтқан.
«Біз Нұртас Адамбайға екерттік. Бізде «Самая вышка» әнінің екі нұсқасы бар. Біреуі ескі, 2017 жылы шыққан. Біз: «Нұртас аға. Бізде мынадай ән бар, бірақ авторлық құқығы қорғалмаған», - деп айтқан болатынбыз. Минусы мен аранжировкасы Youtube.com-нан алынды. Біз сол әннің авторларымен хабарласып, сатып алуымыздың мүмкіндігі жайлы ой білдірдік. Авторлар жауап бермеді. Минусын басқа аспапқа салып, өңдедік те, қайырмасын өзгерттік. Біздің бұл әнге құқығымыз бар», - деді орындаушылардың бірі Артур Дәулетияров.
1 пікір
Пікір қалдыру үшін
Мырзахмет
11 шілде 2018, 21:37Молодец уважуха