Самал Еслямова Сергей Дворцевойдың «Айка» фильміндегі рөлі жайлы айтып берді
Канн кинофестивалінде «Үздік әйел рөлі» жүлдесін иеленген актриса Самал Еслямова Сергей Дворцевойдың «Айка» фильміндегі рөлі жайлы айтып берді. Актриса Мәскеуде заңсыз жұмыс істейтін эмигрант қызды сомдады. Кейіпкер күтпеген жағдайда жүкті болып қалып, босанған соң, сәбиін перзентханада қалдырып кетеді. Бойжеткен белгілі бір себептерге байланысты осындай қадам жасайды.
«Оңай болды деуге болмайды. Қиын болды. Маңыздысы режиссерге деген сенім еді. Режиссерға және істеп жатқан жұмысыңа сенім болған кезде, қиындық маңызды болмайды екен. Мен кейіпкердің жағдайын білдім, оны жақсы түсіндім, соның орнында болған басқалар да солай істейтін еді», - деді Самал Еслямова Канндағы баспасөз-конференциясы кезінде.
Фильм жұмыстары 7 жылға созылған. Режиссер Сергей Дворцевойға бұл таспа идеясы қырғыз әйелдері Мәскеуде сәбилерінен бас тартып, перзентханаға 250-ге жуық балаларды тастап кеткеннен кейін келген екен.
«Мен Орта Азияда, Қазақстанда туып-өскен орыспын. Азиат әйелдерінің балаларға жақсы қарайтынын білемін. Бірақ, олар балаларынан неліктен бас тартты? Оған не түрткі болды? Мәскеуде тұрып, сол өмір жайлы білмейтінімізді түсіндім. Біз осындай адамдық үлкен трагедияны айналып өтіп кетеміз», - деп қосты Дворцевой.
Айта кету керек, «Айканың» тұсауы 18 мамыр күні негізгі байқау бағдарламасы аясында кесілген. Көрсетілімнен соң зал бірнеше минут бойы тұрып, қошемет білдірді.
Баспасөз-конференциясы: youtube.com
1 пікір
Пікір қалдыру үшін
Мырзахмет
24 мамыр 2018, 02:02Рады за Самал. И при этом она была очень скромна. Успехов.