Санжар Мәди «The Mongolian connection» монғолдық атыс-шабыс фильміне түсті

22 Маусым, 2018
BrodKaz
998
0

Актер Санжар Мәди өзін жаңа образда сынап көруде. Жақында отандасымыз «The Mongolian connection» монғолдық атыс-шабыс фильміне түсті, картинада жергілікті мафияның басшысына айналды. Жаңа рөлі мен картина жайлы Санжар «Бродвей» кинопорталына айтып берді.

Өткір сюжетті атыс-шабыс фильмін американдық режиссер Дрю Томас («Қанды кадр») Монғолия, АҚШ, Канада, Ұлыбритания, Түркия және Германия елдерінің кинематографшыларымен бірге түсіруде. Негізгі түсірілім Ұлан-Баторда өтті. Түсірілім тобы жұмысты АҚШ-та жалғастырады.

«Мен монғол мафия басшысын сомдадым. Фильмде негізгі кейіпкер үшеу-ақ – менің рөлім және екі ФТБ агенті, оларды монғол жұлдызы Балжиннямын Амарсайхан және американдық актер Кайви Лайман («Ұрыларды ұстау») сомдады. Сюжет бойынша менің кейіпкерім – Америкада жұмыс істейтін контрабандашы. Бірақ, оны біреулер аяқтан шалады да, ол Монғолияға экстрадицияланады», - деді Санжар Мәди.

Жекпе-жек көріністерін голливуд каскадері әрі актері Лойд Бейтман қойды. Маманның қоржынында 200-ге жуық жоба бар, соның ішіндегі соңғысы - «Кек алушылар: Мәңгілік соғыс».

Айта кету керек, американдық-монғолдық таспаға сонымен қатар, Nomad Stunts каскадері және актер Жандос Айбасов түсті.

«The Mongolian connection» картинасы биылғы жылдың қазан айында Монғолия мен Қазақстанда көрсетіледі деп жоспарлануда.