Серік Әбішев «Тұран» университетінің жанынан киноөндіріске қатысты шеберлік сыныбын ашпақ

26 Маусым, 2017
Мадина
1 934
0

Продюсер әрі режиссер Серік Әбішев «Тұран» университетінің жанынан құрылған шеберлік сыныбына тәлімгерлерді қабылдауда. Продюсер алғаш рет ұстаздық қызметпен айналыспақ. Ол өзінің сабақтарында тәжірибелік тапсырмаларға көбірек көңіл бөлетінін айтты.

«Бұл менің ұстаздық қызметтегі алғашқы тәжірибем, барлығын өзім жүргізетін бірінші шеберлік сыныбым. Негізінен, бакалавриатқа кинода тәжірибесі жоқтар түсіп жатады. Сондықтан, түсірілімдегі тәжірибе негізгі талап емес. Бастысы, олар киноның не екенін және өзін осы салаға толық арнағысы келетінін жақсы түсінуі тиіс. Менің ең басты талабым – киноға деген махаббат, балалар тәуекелшіл әрі қиялшыл болса құба-құп. Менің оқыту әдісім тәжірибеге негізделеді. Әрине, теориясыз да болмайды ғой. Дегенмен, 5 жыл оқыған соң бітірушілер кино түсіре білуі қажет. Мен үшін болашақ тәлімгерлердің біздің еліміздің жағдайына қарай кино түсіре алуы маңызды. Голливудтық немесе кеңестік әдіске емес, дәл Қазақстандағы талаптарға сай әдіске үйрету керек. Тәлімгерлерді тәуелсіздікке үйретіп, өз жобаларын өздері жасай алатын дәрежеге жеткізгім келеді»,-деп бөлісті Серік Әбішев.

_{Суреттер: kapital.kz}

Бүгінде продюсер фильмографиясында «Қаратас ауылындағы оба», «Үй иелері», «Құрылысшылар» және «Риэлтор» секілді фильмдер бар. 2015 жылы продюсер «Үй иелері» фильмінің арқасында «Foreign policy» америка журналының жыл сайынғы «Әлемдік 100 ойшыл» тізіміне енген. 2017 жылы «Сыншылар таңдауында» «Қаратас ауылындағы оба» кинотаспасы үшін Серік Әбішев құрметті алғыс хатпен және мүсіншемен марапатталды. Биылғы жылы кинематографшы V Халықаралық Нью-Йорк Еуразия кинофестивалінде тағы да продюсерлігі үшін құрметтелді.

Серік Әбішев «Май» атты қысқаметражды таспасының және «№6 істің куәгерлері» мен «Балалар үйінде» толықметражды фильмдерінің режиссері болып табылады.

Қазіргі таңда киноқайраткер Темірбек Жүргенов атындағы ҚазҰӨА-да «Режиссура» мамандығы бойынша PhD докторантурасында оқып жатыр.

Превью: Николай Постников