Астанада «Қазақ киносы: кеше және бүгін» кітабының тұсауы кесілді

31 Наурыз, 2017
Мадина
3 144
2

Астанада отандық кинематография мәселелеріне арналған «Қазақ киносы: кеше және бүгін» кітабының тұсауы кесілді. Аталмыш публицистикалық еңбекті кинотанушы, өнертану кандидаты, Қазақстан кинематографистер Одағының мүшесі және Қазақ Ұлттық өнер университетінің "Өнертану" кафедрасының доценті Назира Мукушева жазып шықты.

"Кітап жазуды екі жыл бұрын ойлаған болатынмын. 1993 жылы Қазақстанда алғаш рет "Кинотану" мамандығы ашылды. Әмен Қайдаров, Бауыржан Нөгербек, Әкім Тарази киносыншыларды тәрбиелеу мақсатымен қазақ тілінде сөйлейтін әрі жазатын студенттерді іріктеп алды. Осы үшін мен оларға ерекше алғыс айтамын. Кітабымды Тәуелсіздігіміздің 25 жылдығына арнайтынымды қуана жазған болатынмын. Тәуелсіздігімізге қол жеткізбеген болсақ, онда бізде" Кино және телевидение" факультеті, "Кинотану" мамандығы және осы саланың арнайы мамандары болмас та еді", - деді автор.

«Қазақ киносы: кеше және бүгін» кітабында отандық деректі фильмдердегі, жастар киносындағы мәселелерге, кинематографтардың өзге де маңызды сұрақтарына талдау жасалған. Зерттеу жұмыстары төрт бөлімнен құралған: «Уақыт және қазақ киносы», «Қазақ киносы: көкейдегі көп сауал», «Уақыт. Кино. Тұлға» және «Кино - өмір айнасы».

Шара ҚР Ұлттық академиялық кітапханасында болып өтті. Оған кино, театр, өнер салаларының мамандары, деректі және балалар киносының режиссері Асия Сулеева, Халық әртісі, театр және кино режиссері Талғат Теменов, кинорежиссер Ерлан Нурмухамбетов, киносыншы Инна Смайлова, кинооператор Талгат Тайшанов және басқалары қатысты.

Айдана Кульчибай