Ақан Сатаев «Томирис» жаңа фильміне кастинг жариялады

11 Мамыр, 2017
Мадина
3 508
0

«Қазақфильм» киностудиясы және Sataifilm кинокомпаниясы «Томирис» толықметражды көркем фильміне кастинг жариялады. Өткен жолы хабарлағандай, картина режиссері Ақан Сатаев басты және қосалқы рөлдерге жалпы республикалық кастинг өткізуді жоспарлап отыр.

«Томирис» кинотуындысы танамал тарихи тұлға, сақ патшайымы Томиристің өмірін баяндайды. Әйел қолбасшы Ұлы дала тайпаларын басып алуды көздеген парсы патшасы Кирмен батыл түрде соғысты. Томирис жауынгерлерімен бірге парсы әскерлеріне қарсы тойтарыс беріп, сақ халқының бостандығын сақтап қалды. Фильм негізіне көне грек тарихшысы Геродоттың жазба еңбектері арқау болды.

Тарихи-биографиялық таспаның сценарий авторлары әрі бас продюсерлері - Тимур Жақсылықов пен Әлия Назарбаева. Картина өндірісімен «Қазақфильм» мен «Sataifilm» кинокомпаниялары айналысатын болады.

Кастинг-директор Жайна Әбдиеваның хабарлауынша, үміткерлерге арнайы ерекше талаптар қойылмаған. Кастингке 16 жастан жоғары кез-келген ұлт өкілдері қатыса алады. Балалар мен жасөспірімдер жақыннан түскен суреттерін (басынан аяғына дейін, анфас (толық беті), профиль) casting_satai@mail.ru электронды поштасына жібере алады.

Актерларды іріктеу Алматыда 12-мамырдан бастап қыркүйек айына дейін «Қазақфильм» киностудиясында өтеді.

Ал Астанада кастинг 15-16 мамыр күндері «Жастар» театрында болады.

Басқа қалаларда өтетін кастингтің күні сәл кейінірек белгілі болады. Жаңалықтарды «Кастингтер» бөлімінен оқи аласыздар