Әнуар Нұрпейісов «ЭКСПО-2017» ұйымына қатысты өз пікірін білдірді
Отандық актер әрі қоғам қайраткері Әнуар Нұрпейісов Астанадағы «ЭКСПО» халықаралық көрмесіне қатысты өз пікірін білдірді. Көрмеге жеке барып, павильондармен танысып қайтқан актер шараның оңы мен солын бейнежолдау арқылы баяндап берді.
Әнуар Нұрпейісов шараның ашылуынан да кемшілік тапты. Ол ұйымдастырушылардың сансыз көп отшашуды пайдаланғандарын сынады.
«Маған мерекелік отшашуды оңды-солды бейберекет пайдаланғандары ұнамады. Бір ғана сұрақ – неге? Алдыңғы қатарлы 17 мемлекетті осылай таң қалдырмақпыз ба? Көрменің қандай мақсатпен ұйымдастырылғанын ұмытпау керек еді: жасыл энергетика, энергияның қайта қалпына келтірілетін көздері, жер экожүйесін сақтауға қатысты талап-тілектер - осының барлығы 11 минуттың ішінде жоқ болды ғой. Отшашудан кейін аспанда 20 минут бойы түтін тұрды. Осыдан кейін қандай экология жайында сөз қозғауға болады?»,-деп ұйымдастырушыларға тікелей наразылығын білдірді актер.
_jygj.png)
Нұрпейісов кемшіліктердің арасына көрме аумағында навигатордың және pos төлем терминалдарының жоқтығын, тамақтану нүктелерінің аздығын, азық-түлік пен жатын орындардың қымбаттығын жатқызды. Әнуар Нұрпейісов басшылықтың да, қоғамның да халықаралық көрменің негізгі функциясын дұрыс түсінбегендігін үлкен кемшілік деп санады.
«Менің ойымша, ұйымдастырушылар мен маркетологтар көрмені таныстыруға дұрыс кіріспеген сыңайлы. Көпшілігі «ЭКСПО-ны» ойын-сауық орталығы секілді көреді. Негізі – энергетика саласындағы жаңашыл технологияларды таныстыру ғой. Жалпы, менің жеке пікірім, біздің еліміз мұндай үлкен көлемді шараны ұйымдастыруға моральды тұрғыдан да, техникалық жағынан да әлі толық дайын емес»,-деген болатын актер бейнежолдауында.
Ал көрменің артықшылығына актер ұлттық павильонның ғимаратын жатқызды. Ғимарат тіпті, тәжірибелі қонақтың өзін таң қалдырады. Сонымен қатар, Әнуар еріктілердің жұмысын жақсы бағалады.
пікірлер жоқ, бірінші болыңыз
Пікір қалдыру үшін