Дархан Тастанов «Инстаграмшыл қыз» фильмінің идеясы жайында
Алматыда Инстаграмның танымал қолданушысы - Аinura_official туралы баяндайтын «Инстаграмшыл қыз» комедиясының түсірілімі жалғасуда. Бір күні кейіпкердің аккаунтын біреулер бұзып алады, нәтижесінде бойжеткен оқырмандарынан айырылады. Авторлардың айтуынша, картина әлеуметтік желілерге тәуелді заманауи адамдарға арналған.
«Біздің фильм Инстаграмға тәуелді болған Айнура - Аinura_official туралы баяндайтын «Q-Елі» скетч-шоуынан бастау алады. Аталмыш образ көрермен қызығушылығын тудырған соң, оқиғаны толық метрге айналдыруды жөн санадық. Аinura_official-дың жанкүйерлері кейіпкерді басқа қырынан таниды: бойжеткен туралы және оның отбасы жайында жаңа мәліметтерге қанық болады. Фильм идеясы қарапайым – ешқандай да виртуалды әлемнің нағыз өмірмен, шынайы қарым-қатынаспен, сезіммен теңеспейтінін көрсету»,-дейді қосалқы авторы әрі жобаның продюсерінің бірі Дархан Тастанов.
Дархан сценарийін Қуат Садықовпен бірге 5 ай бойы жазған. Оларға «Q-Елі» жобасының қатысушылары да көмектескен. Режиссері - Арыстану Каунев, ол «Қазақша кәсіп», «Арманмен бетпе-бет», «Аға ма әлде неке ме?» және «Қала аңыздары» картиналарының сценарий авторы болған.
«Фильм түсіріліміне көпшілік көріністерге түскен актерларды санамағанда, 50-ге жуық адам атсалысты. Шамамен, картина айналымға 2018 жылдың көктемінде шығады. Комедия алдымен кинотеатр айналымына шығады, одан кейін оны біраз ТМД елдерінде көрсетуді жоспарлап отырмыз, содан соң ғана туынды «Жетінші арнадан» көрсетілетін болады»,-деп қосты Тастанов.
Басты кейіпкер Айнұрды Анара Батырхан сомдайды, оның жігітін скетчкомдағыдай Қуат Садықов ойнайды. Сонымен қатар, түсірілімге Әбунасыр Серіков, Шәріп Серік және Нұрлан Батыров қатысты.
Түсірілім жұмыстары биылғы жылдың қазан айының соңына дейін жалғаспақ. «Инстаграмшыл қыз» комедиясының өндірісімен «Мәдениет үйі» production компаниясы айналысуда.
Фото: Ербол Қонаров, Ренат Нұғаев
пікірлер жоқ, бірінші болыңыз
Пікір қалдыру үшін