Дина Тасболатова «Алтын Орда» ресейлік хикаясындағы рөлі туралы айтып берді
Жақында «Бірінші арнада» «Алтын Орда» ресейлік тарихи хикаяның көрсетілімі басталады. Фильмдегі басты рөлдердің бірін қазақстандық актриса Дина Тасболатова сомдады. Бұл - оның алғашқы ресейлік жобасы. Кастингтің қалай өткенін және кейіпкерінің кім екенін актриса «Бродвей» кинопорталының оқырмандарына айтып берді.
Жобаға Дина Тасболатованы режиссер Тимур Алпатов шақырған. Белгілі болғандай, актриса мен режиссер бұрынғы бір жоба арқылы таныс екен. Кезінде Дина сол жобаның басты рөлге арналған сынамасынан өткен. Отандасымыз «Алтын Орда» жобасына шақырту алған соң, Мәскеуге аттанады. Ұзақ күткеннен кейін, актрисаны Айжан рөліне – көпестің қызы, Алтын Орда ханы Беркенің үшінші әйелі рөліне бекітіледі.
«Менің кейіпкерім Айжан – сюжеттегі негізгі образдың бірі. Мен оны тазалықтың, нәзіктік пен сұлулықтың бейнесі дер едім. Ол шынайылық пен мейірімділік қасиеттеріне ие. Нәзіктігі мен бағыныштылығына қарамастан, тағдырдың тосын сыйларына қасқайып қарсы тұра біледі. Өз-өзіне адал. Ол ішкі мықты рухының арқасында сынбай келеді. Бұл мен үшін жәй рөл емес: мен әр сахналық көрініске ерекше дайындалдым»,-деді Дина Тасболатова.
Суреттер Дина Тасболатованың жеке Instagram парақшасынан алынды
Тасболатовамен қатар хикаяға Санжар Мәди, Аружан Жазылбекова, Еркебұлан Дайыров, Дәулет Әбдіғапаров пен Алтынай Нөгербек түсті.
«Бірінші халықаралық тәжірибемді ескере отырып, менде ресейлік топпен жұмыс істеп кете аламын ба деген уайым болды. Олардың түсірілім жұмыстары біздікінен өзгешелеу өтеді деген қорқынышпен маған қиын болады деп ойладым. Бірақ, мен бекер уайымдаған екенмін. Біздің тобымыз ең мықты болды, экспедицияның 3 айында біз бір отбасыға айналып үлгердік. Шыны керек, түсірілім тобы мен үшін үлкен бір мереке іспетті болды. Әрине, қиынға соққан көріністер де болды. Мен жылап тұрып, мәтін оқитын бір драмалық көрініс бар. Соны орындау барысында алаңда тыныштық орнаған. Бір уақытта менің қарсы алдымда отырған оператор түшкіріп жібереді. Басқа оператор мен жарық түсіруші шыдамай күліп жібереді. Соларға қарап, түшкірген оператор да қоса күледі. Мен өз дублімді әрең аяқтадым. Аяқ асты келетін күлкі – түсірілім алаңында болатын жиі құбылыс»,-деді актриса.
Дина Тасболатова «Алтын Орда» хикаясының көрермендерін әсерлі сюжет пен қызықты кейіпкерлер күтіп тұрғанын хабарлады.
Еске сала кетсек, актриса «НТВ» арнасының «А.Л.Ж.И.Р.» атты тағы бір ресейлік тележобасына түсіп жатыр.
пікірлер жоқ, бірінші болыңыз
Пікір қалдыру үшін