Ерлан Нұрмұхамбетов «Тыныштық» фильмінің тұсауын Каннда кесті
Режиссер әрі сценарист Ерлан Нұрмұхамбетов Халықаралық Канн кинофестивалінің аясында жаңа үш жобасының тұсауын кесті. Режиссердің жұмыстары алғаш рет Каннда Ұлттық кинематографиялық өнер мен ғылым академиясының бастамасымен ашылған Қазақстан павильонында таныстырылды.
Таныстыру рәсіміне келген қонақтар мен қатысушыларға Ерлан Нұрмұхамбетов үш жобасын ұсынды. Олар: «Тыныштық» деректі фильмі, «Барымташы» («Конокрады») ойнамалы көркем фильмі және «Ұрланған көріністер» («Украденные сцены») кинотаспасы. Алғашқы екі жоба әлі де дайындық үстінде және қаржылық қолдау күтіп жүрген көрінеді. Ал үшінші фильмді режиссер өзінің ҚазҰӨУ студенттерімен бірге түсірген. Режиссер Дәрежан Өмірбаевтың аттас фотокітабының желісімен түсірілген «Тыныштық» деректі фильмі туралы айтып берді:
«Дәрежан Өмірбаевтың фотокітабын қарап отырып, соның ішіне еніп кеткім келді. Құдды бір балалық шаққа саяхат жасағандайсың... Ата-анаң туралы, олардың бала кезі жайында айтып беріп отырған апаңды тыңдап отырғанда, санаңда түрлі образдар пайда болады ғой. Дәл сол секілді... Дәрежан Өмірбаев қарсы болған жоқ. Ол тіпті, кітаптарының желісімен кинолардың түсірілгенін, бірақ фотокітапты пайдаланғандардың болмағандығын айтты. Басында көркем таспа түсіреміз деп ойлаған едік, бірақ, ақыры деректі фильм түсіруді ұйғардық».
Ерлан Нұрмұхамбетовтың айтуынша, «Тыныштық» фильмі қазақ-жапон жобасы болуы мүмкін. Өйткені, жапон компанияларының бірі фильм өндірісіне атсалысуға ниет білдірген көрінеді.
Естеріңізге сала кетсек, кинематографтың соңғы шыққан «Жаңғақ ағашы» фильмі Пусан Халықаралық кинофестивалінде «Жаңа ағым» бөлімі бойынша бас жүлде иеленген. Сондай-ақ, картина Франция, Польша және Австрия ХКФ-де де көрсетілген.
Суреттер: Машрапов Жәнібек, Тұқсаитов Олжас
пікірлер жоқ, бірінші болыңыз
Пікір қалдыру үшін