Қанат Бейсекеев Иранда не үшін тұтқындалғанын айтып берді

26 Маусым, 2018
BrodKaz
882
0

Жақында дерекші-режиссер Қанат Бейсекеевтің Иранда құқық қорғау органдарымен тұтқындалғаны хабарланған болатын. Отандасымыз шетелде өмір сүріп жүрген этникалық қазақтар жайлы жаңа жоба түсіріп жүрген. Бейсекеев не үшін тұтқындалғанын Telegram-да айтып берді.

Режиссердің айтуынша, ол сол ел билігінің ресми рұқсатынсыз түсірілім жүргізген.

«Елдің тәртібі мен бірқатар тыйымдарының әсерінен бейнетүсірілім кезінде қиындықтардың болатынын түсіндім. Бірақ, біз Youtubeтан бірнеше travel-бейнежазбаны көріп, шабыттандық та, біздің де қолымыздан түсіру келеді деп ұйғардық. Түсірілімге арнайы рұқсатты жеті ай бұрын алу керек екен, өкінішке орай, оған уақытым болмады. Тегеранға қонған соң, ешкім бізді және жүктерімізді тексерген жоқ. Біз жылдам әрі жеңіл түрде бақылаудан өтіп, әуежайдан шығып кеттік», - деп жазды Қанат Бейсекеев.

Кейбір материалдарды Тегеранда түсіріп болған соң, режиссер достарымен бірге Горган қаласына аттанады. Түсірілім барысында Қазақстан елшілігінен адамдар келіп, ескерту жасайды. Бірақ Бейсекеев түсірілімді жалғастыра береді. Дегенмен, дерекші жергілікті құқық қорғау органдарымен бәрібір кездеседі. Оны елден ұшайын деп жатқан жерінен әуежайда тұтқындап, түсірілім құралы мен бейнематериалдарды тәркілейді.

«Әуежайда жүктерімізді тексеру кезінде коптерді байқап қалып, бізді тоқтатты. Нұрсұлтан екеуімізді портта полицей учаскесіне жіберді. Әділетті «чекин» жасауға жібердік, сол әрекетіміз дұрыс болған екен, ол тұтқынға алынбады, заттары да тәркіленген жоқ. Нұрсұлтан екеуімізді үш сағатқа жуық тергеді. Ұшатын уақытымыз таяп қалғандықтан, қатты алаңдадық. Жарты сағат қалғанда, коптерімізді алып қалып, өзімізді жіберді. Біз өзіміздің гейтке қарай жүгірдік, ол жақта полициядан да салмақты қызметкерлер – ұлттық қауіпсіздік қызметі күтіп тұрды. Бізді қайтадан учаскеге апарып, барлық сөмкелерімізді ашуды қатаң талап етті. Сөмкемізде қымбат MacbookPro, айпад және көптеген кәсіби аппаратуралар болған. Олар коптерді, компьютерлерді, флешкаларды – барлығын тәркіледі», - деп қоса кетті режиссер.

Болған жағдайға қарамастан, қазақстандықтар фильмді бәрібір көретін болады. Режиссер түсірілген материалдың көшірмесін жасап үлгерген, оны достарының бірі өзімен бірге алып кеткен.