Қазақстандық фильмдер «Бірге жеңдік» деректі кинофестивалінде көзге түсті

22 Мамыр, 2018
BrodKaz
1 061
0

Севастополь қаласында өткен XIV Халықаралық «Бірге жеңдік» деректі фильмдер мен телебағдарламалар фестивалі өз мәресіне жетті. Қазақстандық екі картина жүлдемен оралды: Жайық Белқожаевтың «Мен оралдым» фильмі Халықаралық Киномектептер байқауында «Телефильмнің үздік режиссурасы үшін» жүлдесін иеленсе, Айнұр Ахметжанованың «Жігіттер оны Батя деп атайды» таспасы «Жаңа кейіпкер образын ашқаны үшін» қазылар алқасының арнайы сыйлығына ие болды.

Жайық Белқожаевтың «Мен оралдым» картинасы Жаркент қаласының маңында тұратын оралман жайлы баяндайды. Ер азамат қиындықтарға қарамастан, кішігірім кәсіп ашады. Бұрын таспа ТМД елдері «Үміт» жастар киносының V форумында және II Республикалық «Байқоңыр» қысқаметражды кинофестивалінде «Үздік деректі фильм» аталымында жеңіске жеткен болатын.

Айнұр Ахметжанованың «Жігіттер оны Батя деп атайды» фильмі «Легион» әскери-спорт клубының негізін қалаушы әрі жетекшісі, ауған соғысының ардагері Батыр Абдусаламов жайлы баяндайды. Ер азамат ұзақ жылдар бойы балаларды тегін жаттықтырып, үйретумен айналысады. Картина тұсаукесері былтырғы жылы күзде Қазақстан деректі киносы күндері аясында өткен.

«Бірге жеңдік» Халықаралық фестивалі 2005 жылдан бері Ресейде, Севастопольде өткізіліп келеді. Биылғы жылы фестивальге қатысуға әлемнің 33 елінен 500 деректі жұмыс қарастырылған. Байқау бағдарламаларына Аустрия, Ұлыбритании, Германия, Ирак, Қазақстан, Қырғызстан, Сирия, АҚШ, Финляндия, Чехия мен Эстония елдерінен келген режиссерлардың 83 жұмысы қатысты.