Қазақстандық «Мажорларды» Швейцарияда көрсетеді
Қазақстандық «Мажорлар» фильмі Швейцарияның Женева қаласында көрсетілетін болды. Шетелде тұратын отандастарымызға картинаның көрсетілімі Қазақстандағы тұсаукесерден кейін бірден ұсынылады. Бұл туралы басты рөлді сомдаған Марсель Махмуди өзінің Instagram парақшасында хабарлады. Сонымен қатар, жазбада шараға жақын шетелдердің танымал продюсерлері мен режиссерлары қатысады делінген.
«Мажорлар» кинотаспасының сюжеті Қазақстанның «алтын» жастарының бейқам тіршілігі туралы баяндайды. Картинаның басты кейіпкері - 17-жасар Марсель (Марсель Махмуди), ол өз қалауына оңай қол жеткізіп үйренген жігіт. Көптеген жасөспірімдер секілді, Марсель мен достары өмірде кім болғылары келетінін, болашақта өздерін қай салада көретіндерін ойланып, түсінуге тырысады. Бірақ, ең алдымен жігіттер жауапкершілікті, тәуелсіз болуды үйренулері қажет.
«Мажорлар» фильмінің түсірілімі кезіндегі сурет
Негізгі кейіпкерлерді Әнуар Талғатов, Бахтияр Байсерік және Айым Сейтметова сомдады. Сондай-ақ, картинаға Сиви Махмуди, Байғали Есенәлиев, Михаил Токарев және т.б. актерлар түсті.
Тағдыр еркелері туралы фильмді режиссер Жәнібек Ғұсманов пен бас продюсер Анар Рүстемованың басшылығымен былтыр көктемде түсірген.
Айта кету керек, драманың тұсаукесері ағымдағы жылдың 15-маусымынан 20-шілдеге ауыстырылды. Фильмнің шығу күні не себепті өзгертілгені белгісіз.
пікірлер жоқ, бірінші болыңыз
Пікір қалдыру үшін