Мирас Төлеуханов «Арман картасы» фильмінің түсіріліміне қаржы іздестіріп жатыр
Жақында желіге «Демеуші іздеймін» атты реалити-шоу жүктеледі. Жобаны «Ілмек» фильмінің қоюшы-режиссері Мирас Төлеуханов жүзеге асыруда. Ол осылайша, шоу арқылы жаңа картинасының түсіріліміне қажетті қаржы жинамақ.
«Реалити-шоу жасау идеясы бір ай бұрын туындады, мен Амангелді Жұматайұлымен («Ілмек» фильмінің продюсері – ред.) кездесіп, «Арман картасы» атты жаңа фильмге қаражат сұраған едім. Ол маған осы идеяны ұсынды. Негізі, ол мұндай шоуды бұрыннан бері жасағысы келіп жүрген екен. Мен де: «Неге жасап көрмеске?! Камера бар, жарық қоюдың және сценарий жазудың қажет жоқ» деп ойладым. Келесі күні реалити-шоудың жұмыстарын бастап кеттік»,-деп бөлісті режиссер.
«Демеуші іздеймін» жобасының мақсаты – «Арман картасы» фильмінің түсіріліміне шынайы демеушілерді тауып, 110 000 доллар жинау. Сонымен қатар, краудфандинг те жүретін болады, қазіргі таңда сайт дайындалып жатыр.
«Арман картасы» фильмі – басты кейіпкердің өзгеруін баяндайтын мотивациялық кино. Картинада ертегіге сай, ойдан шығарылған сәттер жоқ. Кейіпкердің басынан өтетін оқиғалар, күнделікті өмірде көрініс табады. Бұл хикаяда әдетте тіс жармайтын тақырыптар қозғалады.
«Шоудың қатысушылары кастинг арқылы таңдалды, барлығына қатаң талаптар қойылған. Келушілердің саны да көп бола қойған жоқ, себебі шарттарымызға тек жігерлі жандар ғана көне алады. Нәтижесінде Кристина Ахмадиева, Аийда Түргенбаева мен Диляра Сағындықова сынды үш қатысушыны таңдап алдық. Шоудың ережесі бойынша, әр қатысушыға бизнес-жаттықтырушы қосылады. Қай топ демеушілерді өзіне көбірек тартса, сол жеңіске жақындай түседі. Шоуда бәсекелестік бар»,-дейді шоу ережесі жайында Мирас Төлеуханов.
Реалити-шоу тобына продюсер Амангелді Жұматайұлы, жоба координаторы Айдана Майкенова, ғаламтор жұмыстарын алға жылжыту жөніндегі маркетолог Сергей Ахметов, Мирас Төлеуханов және Ғалым Рахметов, Ғани Абадан мен Борис Катаев секілді үш бизнес-жаттықтырушы енді.
«Демеуші іздеймін» жобасы Мирас Төлеухановтың YouTube-арнасынан және ishu-sponsora.kz сайтында көрсетіледі.
пікірлер жоқ, бірінші болыңыз
Пікір қалдыру үшін