«Тірі өліктер» хикаясы сегізінші маусымының тұсаукесері Алматыда

17 Қазан, 2017
Мадина
982
0

23 қазан күні Алматыда «Тірі өліктер» хикаясы сегізінші маусымының бірінші бөлімі көрсетіледі. Жаңа эпизод телефильмнің 100-бөлімі, яғни мерейтойлы көрсетілімі болмақ, ол Kinopark 11 EsentaiMall кинотеатрынан беріледі. Шараның ұйымдастырушылары – FOX телеарнасы, «Казтелерадио» АҚ және OTAUTV сауда белгісі.

Тұсаукесер қарсаңында франшиза жанкүйерлеріне арналған арнайы байқау өткізіледі, жеңімпаздар алдын-ала көрсетілім билетіне ие болмақ. 18-20 қазан аралығында алматылық метрода зомбилер (тірі өліктерді бейнелейтін актерлар) жүреді. Байқауға қатысу үшін зомбимен бірге суретке түсіп, #TWD100 #OTAUTV #FOX хэштегімен Инстаграмға жүктеу қажет. Барлық шарттарды орындаған адам тұсаукесерлі көрсетілімге екі билет ұтып ала алады.

Еске сала кетсек, «Тірі өліктер» - аттас комикстер желісінде түсірілген ақырзаман зомбилері туралы баяндайтын танымал американдық хикая. Хоррор-драманы «Шоушенктен қашу» және «Жасыл миля» фильмдерінің сценаристі Фрэнк Дарабонт түсірген. Алғашқы маусымы AMC телеарнасы арқылы 2010 жылы көрермендерге жол тартқан болатын.

Жанкүйерлер сегізінші маусымнан қайтадан Эндрю Линкольн, Чендлер Риггз, Норман Ридус, Джеффри Дин Морган және Мелисса Макбрайдты көре алады. «Тірі өліктер» сегізінші маусымының телекөрсетілімі FOX арнасынан 23 қазан күні Алматы уақыты бойынша сағат 22:00-де басталады.