Рүстем Әбдірашев «Қазақ хандығы» кинохикаясының екінші маусымын түсірмек
Режиссер Рүстем Әбдірашев «Қазақ хандығы» кинохикаясының екінші маусымын түсіруге дайындалып жүр. «Қазақ хандығы. Алмас қылыш» картинасы бірінші маусымының көрсетілімі биылғы жылдың наурыз айында болған еді. Он бөлімнен құралған фильм Қазақ мемлекетінің құрылу тарихын баяндайды.
«Бір жағынан жалғасының түсірілетініне қуанамын, ал бір шетінен алғашқы маусымды түсіру кезіндегі қиындықтарды есіме алсам, біртүрлі қорқыныш билей бастайды. Бұл жолы кішкене болса да оңайырақ болады деп сенемін. «Алмас қылышты» аяқтау үшін краудфандингті компанияны іске қосқанымызды барлығы білетін шығар. Шындығында, қазақстандықтар халқымыздың тарихына қатысты картинаны түсіруге көмектеседі деп үміттенген едік. Алайда қаражат аз жиналды: 1,5 миллион теңге. Дегенмен, үлкен-кіші көмек болмайды ғой. Сондықтан, жобаға өз үлесін қосып, бізге сенім білдірген барша жандарға алғыс білдіреміз. Қаржыландыруға қатысты мәселе туындамас үшін, екінші маусымдық жоба алдағы уақытта өтетін «Еуразия фильм маркет» кинонарығының аясында таныстырылатын болады. Сол жақтан шетелдік компаниялардың қолдауына ие боламыз деп үміттенеміз»,-дейді Рүстем Әбдірашев.
Екінші маусымы «Қазақ хандығы. Алтын тақ» деп аталады. Көрермендерге мәдени әрі экономикалық орталық – Сығанақ қаласы үшін қазақ хандарының көршілес мемлекеттермен шайқасуы көрсетіледі. Картинада Хақназар хан туылғанға дейінгі оқиға баяндалады.
«Біз дайындық жұмыстарын бастап кеттік, натура мен локациялар іздеп, қосымша актерлік құрамды анықтап жатырмыз. 10 бөлім түсіріп, кинонұсқа ұсынуды жоспарлап отырмыз. Мұның барлығы қажетті дүниелер, өйткені хикаяны белгілі бір жастағы көрермен тамашалайды ғой. Ал толықметражды фильм жастар арасында сұранысқа ие»,-деп айта кетті бас продюсер Арман Әсенов.
Авторлар түсірілімге осы жылдың күзінде кіріседі. Негізгі көріністер «Қазақфильм» аймағында, Алматы мен Жамбыл облыстарындағы арнайы құрылған декорацияларда түсірілетін болады. Кейбір эпизодтар Қожа Ахмет Яссауи, Айша-Бибі мен Жошы хан кесенелерінде түсірілмек.
Суреттерді Ш. Айманов атындағы «Қазақфильм» АҚ баспасөз қызметі ұсынды
1 пікір
Пікір қалдыру үшін
Мырзахмет
24 шілде 2017, 13:01Есть, недоработки и флаги надо больше добавить. Народов жуза и одежду изменить.