Санжар Мәди: «Санта-Барбара» хикаясына қарағанда, «Алтын Ордада» шиеленіс көп»
Қазақстандық актер Санжар Мәди Ресей кинематографында танымалдылыққа ие болып жүр. Ол «Қорғаушылар» фильміне, «Алтын Орда» хикаясына түсіп, жақында ғана «Саз шұңқыр» жобасындағы түсірілімін аяқтады.
«Алтын Орда» көпсериялы фильмі «Марс медиа» компаниясымен «Бірінші арнаға» бағытталып түсірілген. Желіге трейлері де шығып үлгерді.
Хикая эфирге шықпай тұрып, «Алтын Ордада» негізгі рөлдердің бірін сомдаған Санжар Мәдидің кейіпкерімен таныс болайық.
«Кейіпкерімнің есімі - Мәңгі Темір. «Алтын Орда» - «Бірінші арнаның» «Марс Медиамен» біріккен жобасы. Өте өршіл, қызықты, жаһандық хикая деп айтар едім. Фильм Мәскеу мен Крымда түсірілді. Хикая 2016 жылдың тамызынан бастап, 2017 жылдың қаңтарына дейін өте ұзақ уақыт түсірілді. Мені рөлім ерекше әрі қызықты болды. Мен хан Беркенің кеңесшісін сомдаймын. Ол мәмілегерліктен хабары жоқ қарсыласы Ноғаймен бірге таққа таласады. Ал Мәңгі Темір керісінше, келісім жасауды біледі. Бұл жобаға менен басқа Аружан Жазылбекова, Дина Тасболатова, Еркебұлан Дайыров, Дәулет Әбдіғапаров, Алтынай Нөгербек, Азамат Нұғыманов, Асқар Ілиясов атсалысты», - дейді актер.
Суреттер Санжар Мәдидің жеке Facebook парақшасынан алынды
Мәдидің айтуынша, «Алтын Орда» хикаясындағы шиеленіс қыза түскен.
««Алтын Орда» шынайы оқиғаларға негізделген. Бірақ, біраз аты-жөндер өзгертілді. Дегенмен, жобаның негізгі тарихи құндылығы сақталып қалды. Тақырып қызыққа толы болмақ. Шиеленістер, қақтығыстар, зерттеулер – барлығы бар. Маған «Алтын Орданы» «Тақтардың ойыны» фильмімен салыстырғандары ұнамайды. Өйткені, «Тақтардың ойыны» - жазушы ойлап тапқан ертегі. Ол жақта тарихи фантастика көбірек. «Санта-Барбара» хикаясына қарағанда, «Алтын Ордада» шиеленіс көп»,-деп қосты Санжар.
Хикаяға Ресей актерларынан Александр Устюгов, Светлана Колпакова, Юлия Пересильд, Сергей Пускепалис түсті.
пікірлер жоқ, бірінші болыңыз
Пікір қалдыру үшін