Режиссерлар мен продюсерлердің фильм түсіруге және оны жүзеге асыруға қатысты кеңестері

18 Маусым, 2017
Мадина
1 815
0

Алматыда «Go Viral» тың идеялар фестивалі болып өтті. Онлайн-қызметтер мен әлеуметтік желілер арқылы жобаларды алға жылжытуға арналған идеялармен алмасу мақсатында ұйымдастырылған алаңқай Қазақстан мен шетелдік кәсіби медиа және кәсіп пен мәдениет өкілдерін біріктірді.

Фестиваль тақырыбының бірі кино саласына арналды. Фильмдер өндірісіне қатысты кеңестерімен және идеяларымен режиссерлар мен кино мамандары бөлісті. Қазақстандық режиссер әрі продюсер Нұртас Адамбай фильм түсіріліміне қажетті қаржыны бірнеше тәсілмен табуға болатынын айтып берді.

«5-10 жыл бұрынғы уақытқа қарағанда бүгінде қаржыландыруды табу оңайырақ. Өйткені, қазір әлеуметтік желілер, YouTube арнасы бар. ол жақта көркемдік кеңестер жоқ. Идея қызықты болса, оны жан-жақты жарнамалауға болады. Мысалы, «Хардкор» секілді. Жобаның ролигі пайда болып еді, оны мамандар байқап қалды. Нәтижесінде «Bazelevs» компаниясы осы жобаны өз қолына алып, фильм түсірді. Сондықтан, жас режиссерлардың бұл мәселеге қатысты көптеген мүмкіндіктері бар»,-деп өз пікірін білдірді Нұртас Адамбай.

Сурет Go Viral фестивалінің жеке Instagram парақшасынан алынды

Деректі кино режиссері Гриффин Хаммонд бүгінгі таңда кез-келген адамның өз фильмін түсіре алатындығын атап өтті.

«Сізде кәсіби құрал болмаса да, бәрібір фильм түсіруді бастай аласыз. Оған қажетті 4 нәрсе бар: жарық, көп жағдайда – күндізгі тегін жарық, тұрақты кадр, жақсы монтаждалған материал және ең бастысы – сізде негізгі оқиға болуы шарт. Өйткені, оқиғасыз қанша әдемі фильм түсірсеңіз де, ол ешкімге қызықты болмайды»,-деді Хаммонд.

Сурет Go Viral фестивалінің жеке Instagram парақшасынан алынды

Картинадағы оқиғаның маңыздылығын кино маманы Йоргос Крассакопуло да айтып кетті. Сарапшының пікірінше, табысты болу үшін авторды мазалап жүрген оқиғаны баяндау керек екен.

«Айтқыңыз келген оқиғаның сізге қатысы болуы керек немесе ол сіздің жан-дүниеңізден өтуі шарт. Адамдар фильм арқылы өздерін көрсе, ол жақсы құбылыс. Қазақстанда болып жатқан мәселе грек аудиториясына біртүрлі болуы мүмкін. Бірақ, бір адамның хикаясы әлем бойынша көптеген адамдардың жүрегіне жол табуы ықтимал. Ең маңызды дүние – оқиға сіздің жүрегіңізден шығуы керек, сіз үшін өте маңызды болғаны жөн»,-деп түсіндірді Йоргос Крассакопуло.