«Көне жетіген» жаңа хикаясының түсірілімі басталды
Оңтүстік Қазақстан облысында «Көне жетіген» атты 15-бөлімді хикаяның түсірілімі басталды. Картина қазіргі кезде болған тылсым оқиға туралы баяндайды. Идея туралы режиссер әрі продюсер, «САҚ» киностудиясының директоры Нұриддин Патеев толығырақ айтып берді.
«Фильм жетіген музыкалық тылсым аспабы туралы хикаяны баяндайды. Аспаптың асықтары Жерге құлап түскен метеориттен жасалған. Жеті асықты арам ниеттен қорғау мақсатында Қазақстан аумағының жан-жағына шашып жібереді. Ғасырлар өткен соң, бұл оқиға ұмытылады. Тек құрылыс жұмыстары жүргізілгенде, асықтың біреуі табылады. Бұл туралы телеарнадан естіген Самал жігітімен бірге асық табылған жерге барады. Қос кейіпкер қалған асықтарды іздей бастайды»,-деді режиссер.
«Көне жетіген» хикаясының түсірілімінен сурет
Басты рөлді сомдайтын актрисаны Алматы мен Шымкенттен іздеген. Нәтижесінде, Самалдың рөліне «Тұран» университетінің бірінші курс студенті Карина Жұмалиеваны бекіткен.
Сценарий авторы - Бақытжан Қожабай. Телефильм Оңтүстік Қазақстан облысы әкімінің тапсырысы бойынша түсіріліп жатыр.
Режиссердің айтуынша, түсірілім тобы жұмысты биылғы жылдың соңына дейін бітірмек.
пікірлер жоқ, бірінші болыңыз
Пікір қалдыру үшін