«Бойжеткен мен теңіз» фильмінің түсірілімі аяқталды

1 Тамыз, 2017
Мадина
1 531
0

Отандық режиссерлар Әзизжан Заиров пен Мұхамеджан Мамырбеков «Бойжеткен мен теңіз» әлеуметтік драмасының түсірілімін аяқтады. Картинаның түсірілімі биылғы жылдың маусым айында басталып, Алматыда өткен.

«Бойжеткен мен теңіз» кинотаспасы Әсел есімді мүмкіндігі шектеулі бойжеткен туралы баяндайды. Кейіпкер өз өмірін ретке келтіргісі келеді. Оның басты арманы – сүйікті адамын жолықтырып, отбасын құру. Армандарды орындайтын теңіз туралы естіп, бойжеткен сол жаққа бет алады.

«Біз 3 жыл бойы осы картинаны түсіруге талпынып келеміз. Краудфандингтің көмегімен жекеменшік қаржы іздестірдік. Бірақ, айтарлықтай алға жылжу болған жоқ. Ақыры, Мәдениет министрілігімен сөйлесуді жөн көрдік. Олар жобамызды толығымен қолдады. Фильмде мүгедек жандардың, әсіресе жас қыздың шынайы өмірі көрсетіледі. Бойжеткен жолында талай кедергілер мен қиындықтарға тап болады, ауыртпашылықты сезініп, үмітін үзе бастайды. Дегенмен, әрі қарай талпына береді. Таспаның негізгі идеясы – өмірдегі ең басты нәрсе махаббат екендігін көрсету»,-дейді Әзизжан Заиров.

«Бойжеткен мен теңіз» фильмінің түсірілімінен сурет

_{Суреттер Әзизжан Заировтың жеке Instagram парақшасынан алынды}

Басты кейіпкерді МБАҚ реабилитациялық орталығының қамқорлығындағы қыз Динара Шарипова сомдады. Авторлардың айтуынша, Динара өте мықты әрі көңілді қыз. Өзінің мүмкіндігі шектеулі жан екендігіне қарамастан, Динара мектеп пен университетті жақсы бағамен бітірді. Бүгінде ол банк қызметкері болып жұмыс істейді әрі шығармашылық жолын қатар алып жүр.

Түсірілім алаңында жас актрисамен бірге Тахир Омаров («Бола ма, әлде болмай ма?»), Гүлбахрам Байбосынова және Қанағат Тасқараев жұмыс істеді.

«Бойжеткен мен теңіз» драмасы «Шектеусіз мүмкіндіктер» дилогиясының екінші бөліміне айналды. Фильм ҚР Мәдениет және спорт министрлігінің және «Қазақфильм» киностудиясының қолауымен түсірілді.