«Оралман из Питера»: Музыканы қайтарыңдаршы
Араларын бір апта бөліп тұратын екі отандық фильм музыканттардың продюсерлігімен жарыққа шықты. Бірі - Сиви Махмуди мен Ренат Баситтің бейнелерін ғана көрсету үшін түсірілгендей әсер қалдырған «Соқыр махаббат» фильмі болса, енді бірі киноға аздап ұқсайтын «Оралман из Питера» музыкалық комедиясы.
Сюжет бойынша ауылдан келген үш музыкант ауыл клубына арналған жаңа аппаратура сатып алуға (әкімнің тапсырмасымен) Алматыға келеді. Алайда, Қырғызбек есімді жасы үлкен кісі құмар ойындарының алдында дәрменсіз болып шығады да, үшеуі қомақты қаржы қарыз боп қалады. Қарыздан құтылудың жалғыз жолы - музыкалық байқауда жеңіске жету. Бірақ, үштік байқауға өту үшін қастарына әнші қыз алулары керек болады.
Кейде мін таға алмайтын, мақтауға да болмайтын картиналар болады. Осындай фильмдердің бірі - клипмейкер Ален Ниязбековтың дебютті жұмысы «Оралман из Питера». Музыкалық комедияның кем-кетігі мен артықшылығы бір-бірін толықтырып тұрғандай. Бұрынғы КТК ойындарының қатысушылары жасаған Ниязбековтың картинасы жақсы әзілдерге қарамастан солғын көрінеді.
Негізінде, туынды жаман емес. Әйгілі «Бременские музыканты» (бұл жерде шынайы ертегі емес, нақты кеңес мультфильмі) картинасына ұқсас келеді. Тіпті, фильмде бұзақылар да бар (казино күзетінің бейнесінде). Басты мәселе мынада боп тұр: «Оралман из Питера» фильмінде музыкалық номерге басымдық беріп, басты рөлдерге ән айта алатын музыкант актерлерді алу керек еді деп ойлайсың.
_mast.PNG)
Дәурен Айдарқұлов, Қуандық Шәкіржанов пен Асан Мәжит картинаның комедиялық бөлімдерін жақсы алып шықты. Динара Бақтыбаева романтикалық образды тамаша ойнап шықты. Дегенмен, музыканттар туралы кинода музыкалық элементтердің болуы, олардың керемет орындалуы шарт. Әлемдік кинода мұндай мысалдар көп, ал отандық фильмдерді алатын болсақ, Баян Есентаеваның «Ғашық жүрек» картинасында Мөлдір Әуелбекова мен Жанар Дуғалованың вокал шеберлігі және сахнада ән орындауы қойылымдағы, сюжеттегі, техникалық бөлімдегі кемшіліктерді жасырып қалған болатын.
«Оралман из Питера» фильмінде актерлік құрамның басқа біреудің дауысымен (фонограммаға ілесе алмай) ән салып жатқаны бірден білінеді. Екіншіден, эстрадада өнер көрсетуден тәжірибесі жоқ. Сол себепті, кейіпкерлер көрерменді сендіре алмайды. Әрине, олардың сүйкімді, күлкілі (әсіресе, көп қалжыңдай білетін Қуандық Шәкіржанов) екендігі даусыз, бірақ таң қалдыра алмасы анық.
Фильмнің тағы бір кемшілігі - түсініксіз кадрлардың болуы. Кино атауының негізгі мазмұнына түк қатысы жоқ сияқты.
«Оралман из Питера» киносының аталған кемшіліктерге қарамастан, жеңіл комедия екені даусыз. Картина тіпті, отандық нарықтың бір жаңалығы іспеттес. Тек осындай керемет қызықты сценарий бола тұра, тәжірибелі клипмейкер мен музыканттың музыкалық қойылымдарға келгенде ақсап жататыны өкінішті. Соның кесірінен, туынды көрермен есінде әзілден басқа ұзаққа сақтала қоймайды-ау.
Киноға Кәрім Қадырбаев барды
Оцените рецензию
пікірлер жоқ, бірінші болыңыз
Пікір қалдыру үшін