«Анаға апарар жол» драмасы Нью-Йоркте марапатқа ие болды

16 Наурыз, 2018
Мадина
1 804
0

Ақан Сатаевтың «Анаға апарар жол» драмасы Нью-Йоркте өткен WeLink Халықаралық кинофестивалінде жүлделі болды. Картина «Өмір жетістіктері» аталымына ұсынылып, «Үздік көркем фильм» ретінде бас жүлдеге ие болды.

«Анаға апарар жол» таспасы көрермендерге өткен жүзжылдықтағы 30-40 жылдарды көрсетеді. Сюжетте кезінде белгілі бір жағдайларға байланысты анасынан көз жазып қалған Ілияс бейнеленген. Жігіт ұзақ жылдар бойы анасына, туған үйіне барар жолды іздейді. Үйге барар жол өте ұзақ әрі қиын еді.

Картинаға Әділ Ахметов, Аружан Жазылбекова және Алтынай Нөгербек түсті. Фильмнің бас продюсері - Әлия Назарбаева.

WeLink кинофестивалі БҰҰ ұйымдастырған «Кинематографтағы әйелдер» форумы аясында өткен. Фестиваль бүкіл әлемдегі кинематографшылардың басын қосып, тәжірибе алмасып, ортақ туынды жасау мақсатында жыл сайын өткізіліп тұрады.

Еске сала кетсек, «Анаға апарар жол» қоржынында Қырғызстан, Ресей, Испания мен Хорватияда өткен Халықаралық кинофестивальдерден алған бірқатар жүлделер бар.