Қазақстандықтың қысқа метрі Лас-Вегастағы Action On Film Festival кинофестивалінде ерекше аталып өтті
Алмаз Амандосовтың «Vengeance Oil» қысқаметражды таспасы АҚШ-та, Лас-Вегаста өткен Action On Film Festival кинофестивалінде Үздік студенттік қысқа метр» номинациясын жеңіп алды.
«Біздің фильмді кинотеатрдан көрсетіп жатқанда көрермендердің ықыласы мен қошеметін ерекше болды. Ал көрсетілімнен соң басқа қатысушылардан картинаға қатысты жағымды пікірлерді естідім. Жалпы, көрермендердің ықыласы қазылар алқасына да ерекше әсер еткен болса керек, бізге осы жүлде табысталды. Өкінішке қарай, оқуға байланысты Лас-Вегастағы фестивальдің соңына дейін бола алмадым, сондықтан салтанатты марапаттауды өткізіп алдым»,-деп бөлісті Амандосов.
Кинотаспа жүрегі кекке толы әскердің алқаш ардагері туралы баяндайды. Кейіпкер сыры ашылмаған өлімнің арасында өмірлік махаббатынан айырылып қалады, жобалап кінәлі адамның ізін аңдып жүреді. Кейіпкер бар күшімен әділеттілікке қол жеткізгісі келеді.
«Vengeance Oil» фильмінен көрініс
«Vengeance Oil» фильмінің жанры – қара комедия-драма. Мен осы жанрдың жанкүйерімін. Таспа Тарантино, ағайынды Коэндер, Уэс Андерсон, Эдгар Райт, Финчер сынды әйгілі режиссерлардың туындыларына ұқсайды. Мен ерекше стильдердің комбинациясын - шынайылық пен драма элементтері бар күлкілі комедия қосындысын жасадым»,-деп қосты режиссер.
Қысқаметражды фильмнің түсірілімі үш күн бойы Лос-Анджелесте өтті. Картинадағы басты рөлдерді Эндрю Фульц, Роберт Фактор, Сэм Мэйсон және Италиядан келген актриса Джулия Джованетти ойнайды. Операторы - Джастин Кнодел. Фильм жұмыстары биылғы жылдың сәуір айында аяқталған, қазіргі таңда фестиваль кезеңі өтуде.
Айта кету керек, «Vengeance Oil» фильмінің көрсетілімі II Республикалық «Байқоңыр» қысқаметражды кинофестивалінде өтті.
пікірлер жоқ, бірінші болыңыз
Пікір қалдыру үшін