Мейірхан Шерниязов: «Бізде «Тіркеуші» сияқты фильм әлі түсірілмеген»

5 Наурыз, 2018
Индира Бекмахамбет
1 738
0

20 наурыздан бастап кинотеатрларда «Тіркеуші» фильмінің көрсетілімі басталады. Комедиялық таспа көптеген келеңсіз жағдайларға тап болатын көлік жүргізушісі жайлы баяндайды. Отандық көрермендерді картина несімен қызықтыратынын қоюшы-режиссер Мейірхан Шерниязов айтып берді.

Айта кету керек, бұл жоба актердің толықметражды кинодағы алғашқы режиссерлік тәжірибесі.

«Фильмнің ерекшелігі картинадағы іс-әрекеттер толықтай көлікте өтті, барлығын статикалық камерамен бір кадрмен түсірдік. «Тіркеуші» сияқты фильм бізде әлі түсірілген жоқ деп нақты айта аламын. Режиссері өзім болдым. Әрине, қиындықтар болды. Бірақ жобамен жалғыз өзім айналысқан жоқпын, біз Мейірхан Төребаев және Медет Аманбаевпен бірге жұмыс істедік», - деп бөлісті Мейірхан Шерниязов.

Сюжеттің ортасында жігіт өзінің «люкс» көлігіне сақтықпен қарайтын кірпияз кәсіпкердің жүргізушісі болып орналасады. Жұмыстың бірінші күні көлік жүргізушісі көлікті тұраққа апарып қою туралы тапсырма алады. Бірақ, ешқандай артық күшті талап етпейтін тапсырма фильм кейіпкері үшін қорқынышты сынаққа айналуы мүмкін.

Фильмде Мейіржан Төребаев, Медет Аманбаев, Мейірхан Шерниязов, Әбунасыр Серіков және Әзім Саидбаев ойнады.

«Дайындық кезеңі 2017 жылы қазанның басында өтті, ал түсірілім желтоқсан айында басталды. Фильмді 9 күнде түсірдік. Түсірілім күнінің аздығына қарамастан, түсірілімнің техникалық жағы қиындау болды. Түсірілім кезіндегі көлік қалада камерамен, жарықпен, штативпен жүріп отырды. Түсірілімге қатысқан барлық жандарға алғыс айтқым келеді. Жігіттер, ақысыз жұмыс істеді деп айтуға болады»,- деді режиссер.

«Тіркеушінің» түсірілім тобына қоюшы-операторлар Сәбит Семетов және Айдар Оспан, дыбыс режиссері Денис Коноплев және композитор Александр Шевченко кірді. Өңдеу режиссері Әнуар Мәтжанов болды.

Фильм Make Films компаниясымен шығарылды.

«Тіркеушінің» ресми трейлерін осы жерден көруге болады.