Олжас Ахметов: «Бөлінбейтін» - оқиға кішігірім дәмханада өрбитін таспалы кино»
Алматылық «Сталкер» киномектебінің түлегі Олжас Ахметов дебютті толық метр түсіріп жатыр. Жас режиссердің айтуынша, оның алғашқы қарлығашы «Бөлінбейтін» қылмыстық комедиясы болмақ.
«Бөлінбейтін» - оқиға кішігірім дәмханада өрбитін таспалы кино. Бір топ адам ақша мәселесімен келіспеушіліктерге тап болады. Картина комедия элементтері бар қылмыстық жанрда түсіріліп жатыр. Сонымен қатар, фильмде махаббат хикаясы болады. Актерлар арасында кастинг өткізілген жоқ. Баз киноға кімдердің қатысатынын алдын-ала білдік. Фильмге қатысуға ең алдымен Әзиз Бейшеналиев пен Ерден Тілемісовты шақырдық. Одан кейін актер Алексей Шемеске хабарластық, ол сценарийді оқып шығып, фильмге түсуге келісімін берді»,-деді Олжас Ахметов.
Режиссер таспалы киноның актерлік ойынға және сценарийге байланысты екенін назарда ұстап, фильмге Берік Айтжанов, Нұржан Садыбеков, Асан Мәжит, Шыңғыс Капин және Ербол Семқұлов сынды танымал актерларды, ал сценарий жазуға жас автор Дарын Тоқтаровты шақырды.
«Алғашқы толық метр түсіру идеясы қыста туындаған еді. Мен бірден ескі танысыма, автор Дарын Тоқтаровқа жүгіндім. Екеуіміз бірге идеядан бастап, сценарийдің соңғы нұсқасына дейін жазып бітірдік. Көрермендер Квентино Тарантиноның жұмыстарына ұқсас дүниені көретін шығар. Біздің бір ғана мақсатымыз болды – аз ғана қаражатқа жақсы ойнамалы кино түсіру»,-деп қосты режиссер.
«Бөлінбейтін» киносы Алматы облысындағы дәмханалардың бірінде түсіріліп жатыр. Түсірілім биылғы жылдың 8 тамызында аяқталмақ.
пікірлер жоқ, бірінші болыңыз
Пікір қалдыру үшін