Бірінші Орталық Азия деректі кино форумы есігін айқара ашты
Алматыда Темірбек Жүргенов атындағы Қазақ ұлттық өнер академиясында Нұрсұлтан Назарбаевтың «Ұлы даланың жеті қыры» мақаласына арналған бірінші Орталық Азия деректі кино форумының ашылу салтанаты өтті.
Шарада Т. Қ. Жүргенов атындағы ҚазҰӨА ректоры, философия ғылымдарының докторы Асқат Маемиров, «Қазақфильм» киностудиясы директорлар кеңесінің төрағасы Бақыт Қайырбеков және «Кино және телевидение» факультетінің деканы, өнертану кандидаты Гүлнар Мүрсәлімова сөз сөйледі.
«Бірінші Орталық Азия деректі кино форумы президентіміз Нұрсұлтан Назарбаевтың «Ұлы даланың жеті қыры» мақаласы негізінде өтіп жатыр, мақсаты ұлттық тарихымызды терең зерттеп, оны деректі фильмдер арқылы кинокеңістікте тарату болып табылады. Академиямыздың «Кино және телевидение» факультетінде деректі кино режиссурасы бойынша оқытылу курстары жүзеге асырылып жатыр», - деді Асқат Маемиров.
ҚазҰӨА доценті, дерекші-режиссер Әсия Байғожинаның басшылығымен өткізіліп отырған Орталық Азия форумы 7 желтоқсанда аяқталады. Форумда өзбек режиссері Баходыр Юлдашевтің «Улугбек» картинасы көрсетіледі және отандық қоюшы Бақыт Қайырбековтың тарихи көрмесі өтеді.
Жалпы, шарада 20 деректі жұмыс ұсынылады, әр елден – Өзбекстан, Қырғызстан, Тәжікстан мен Қазақстаннан бес фильмнен көрсетілмек.
Форумның құрметті қонақтары: КСРО мемлекеттік сыйлығының лауреаты режиссер Шухрат Махмудов, өзбек кинотанушысы Разика Мергенбаева, Қырғызстанның алдыңғы қатарлы дерекшісі Жанышбек Дадабаев, Қазақстан дерекшісі Владимир Тюлькин, режиссерлар Әнуар Райбаев, Евгений Лумпов, кинотанушы Александра Лумпова, НЕТПАК пен ФИПРЕССИ қазылар алқасының мүшесі ГүлбараТоломушова, «Дидор» ХКФ арт-директоры, философия ғылымдарының докторы Садулло Рахимов, тәжік режиссері әрі продюсері Орзумурод Шарипов.
.jpg)
пікірлер жоқ, бірінші болыңыз
Пікір қалдыру үшін