Руслан Акун «Мықтылар уақыты» фильмін таныстырды
Алматыда Kinoplexx Saryarka кинотеатрында «Мықтылар уақыты» спорт драмасының тұсауы кесілді. Картинаны қалың көпшілікке режиссер Руслан Акун, продюсер Нұрбек Айбашов және басты рөлдерді сомдаған Асылхан Төлепов пен Гүлназ Жоланова таныстырды. Таспа кинотеатрлардан 20 қыркүйектен бастап көрсетіледі.
«Мықтылар уақыты» фильмі көкпар спорттық ойынына арналған. Сюжетте «Жалын» тобының бұрынғы капитаны Мақсат туралы баяндалады. Шешуші жарыста жеңіліс тапқан жігіт топтан кетеді. Кіші отанына оралған ол жағымсыз хабарды естиді. Ауылдастары мен отбасын ауылдан қууы мүмкін. Тұрғындардың мәселесін шешу үшін қомақты қаражат қажет. Мақсат батыл жігіттерден топ жасақтап, көкпар турниріне қатысуды ұйғарады. Ақшалай бас жүлде – туған ауылын құтқаратын жалғыз жол.
Режиссер Руслан Акунның айтуынша, фильм көлемі мен техникалық жағынан бұрынғы жұмыстарынан өзгерек екен.
«Көкпар ойыны туралы түсіру идеясы бұрын туындаған. Мұндай фильмді техникалық жағынан түсіру қиын болғандықтан, кейінге қалдыра бердік. Алдыңғы жобалардан тәжірибе жинап болған соң, тәуекелге бел буып, осы идеяны жүзеге асыруды ұйғардым. Әрине, қиын болды. Бірақ, топ аянбай еңбек етті. Актерлармен жолымыз болды. Кастинг бірнеше кезеңнен тұрды. Жалпы, үш мың адамды қарастырдық. Асылханмен жеке танысқан соң, оның Мақсат екенін түсіндім. Бізге ер тоқымда отыра алатын, физикалық дене бітімі қалыптасқан ойнамалы актер қажет еді. Біз барынша ойын сәтіне берілуге тырыстық, көрермен залдан өзі көкпар ойнағандай күйде шықса екен дедік», - деді Руслан Акун.
Экшн мен ат трюктері элементтерінен құралған картинаның түсірілімі Ыстық көл жағасында орналасқан Шолпан ата курорт қаласында өтті. Авторлар бір жылдай түсірілімге дайындалған, ал түсірілім барысы бір айдан аса уақытқа созылды.
Авторлар фильмде компьютерлі графикада бас тартқан. Қиын ат трюктері мен экшн көріністерді Nomad Stunts каскадерлік тобы, Қырғызстан каскадерлар гильдиясы және Қараой ауылындағы көкпар тобы қойып, орындады.
«Мықтылар уақыты» спорт драмасы Қазақстан мен Қырғызстанда ғана емес, Өзбекстанда, Тәжікстанда және Ресейдің кей аймақтарында да айналымға шығады деп жоспарланып отыр.
«Мықтылар уақыты» фильмінің трейлерін мына жерден көруге болады.
пікірлер жоқ, бірінші болыңыз
Пікір қалдыру үшін