«Мұзбалақ» мультфильмінің саундтрегіне бейнебаян түсірілді

1 Маусым, 2018
BrodKaz
1 214
0

Отандық «Мұзбалақ» мультфильмінің ерекше саундтрегі пайда болды. Аттас лирикалық шығарманы «Қазсақ» этно-фольклорлы тобымен бірге Ұшқын Жамалбек орындады. Ән жазу мен бейнебаян түсірілімі «Қазақфильм» киностудиясында өтті.

Әні мен сөзінің авторы - Ұшқын Жамалбек, оның шығармалары ұлттық бояу мен заманауи үрдістерден құралған. Орындаушының сөзінше, ол «Мұзбалақты» көрген соң, шабыттанғаны соншалық, фильмге 4 ән жазып қойған. Солардың бірі басты музыкалық шығарма ретінде таңдалды.

«Мұзбалақ» мультфильмі бүркіт пен адам арасындағы достық жайлы баяндайды. Жігіттер Ақтай мен Шігер әйгілі ұябасар бүркітті іздеп жүріп, балапаны – Мұзбалақты жолықтырады. Дәл сол алқаптағы тұрғындарды қаһарлы Айдаһардан құтқаруы тиіс.

Анимациялық таспаны режиссерлар Тұрдыбек Майдан және Тілек Төлеуғазы түсірді. Картина жұмысы екі жылға созылған. Мультфильм түсіріліміне 40 суретші-аниматорлар жұмылдырылды. Таспа Мәдениет және спорт министрлігінің тапсырысымен «Қазақфильм» базасында өндірілді.

Саундтрек бейнебаянын көрермендер жақында бағалай алатын болады.

Еске салсақ, «Мұзбалақ» фильмінің трейлері биылғы жылдың қаңтар айында шыққан болатын.