Талғат Теменов «Махаббат бекеті» жалғасының түсіріліміне рұқсат бермеген

31 Шілде, 2018
BrodKaz
1 676
0

Кинорежиссер әрі сценарист Талғат Теменов Баян Алагөзованың «Махаббат бекеті» фильмінің жалғасын өзінің рұқсатынсыз түсіргеніне таң қалды. Картина қоюшысының айтуынша, продюсер оның авторлық құқығын бұзған. Бұл туралы Талғат Досымғалиұлы abai.kz-ке берген сұхбатында айтқан.

«Мен осы ақпаратты сол фильмді түсіріп жатқандардан емес, айдаладағы біреулерден естідім. Жасырмаймын, естіп таң қалдым. Тіпті, ұяттау болды. «Махаббат бекеті» ол - менің фильмім. Тіпті, керек десеңіз, мен «Махаббат бекеті» фильмінің режиссері, сценарий авторы ғана емес, повесттің де авторымын. Айтпақшы, былтыр маған Баян хабарласты. Анау бір қайғылы оқиғадан кейін, ауруханадан шыққан кезі екен. Хабарласып, «Талғат Досымғалиевич, бір бомба дүние жасайық» деп, осы «Махаббат бекетінің» жалғасын түсіру туралы айтты. Әзіл-шыны аралас әңгімемізден кейін, мен «көрейік» деп қоя салдым. Одан кейін, ол менің көмекшіммен бір мәрте ғана сөйлескен. Біз фильм түсіруге келісімімізді бермедік», - деп түсіндірді Талғат Теменов.

«Махаббат бекеті» - 1993 жылы жарыққа шыққан мелодрама. Фильмдегі Гүлназ есімді басты кейіпкерді Баян Алагөзова сомдаған. Аталмыш рөл оның кинодағы актерлік дебюті болатын.

«Махаббат бекеті» жалғасының шығу мүмкіндігі жайлы Баян Мақсатқызы алғаш 2017 жылы айтқан еді. Биылғы жылдың мамыр айында продюсер кастинг өткізіп, шілдеде тобымен бірге «Тағдыр бекеті» таспасының түсіріліміне кіріскен.

«Бұл - ұрлық. Интеллектуалды ұрлық. Мен - авторымын. Менің шығармама менің рұқсатымсыз неге тиседі? Өздерінің де фильмдері бар ғой. Керек болса, Баян «Коровасының» жалғасын түсірсін. Автор ретінде мен бұған келіспеймін. Егер Америкада немесе Еуропада болсақ, бұл үшін Баян жауап беретін еді. Бір дүние анық. Олар бұны өнер жасайын деп түсіріп жатқан жоқ. Ақша табу мақсатында жасап жатыр. Сондықтан, керек болса Еуропалық, Бүкіләлемдік авторлық құқық қорғау ұйымдарына шығуға дайынмын», - деп қоса кетті Талғат Досымғалиұлы.

Еске сала кетсек, «Тағдыр бекетінің» түсірілімі аяқталды. Фильм режиссері Ернар Нұрғалиев болды.