Балалар үйінің тәрбиеленушілері «Қазақфильм» киностудиясына барып қайтты
Қазақстанның әр түкпірінен келген балаларға «Қазақфильм» киностудиясын көріп қайту бұйырды. Шара Қазақстан Республикасы Тұңғыш Президенті – Елбасы қорының ұйымдастыруымен жүзеге асты.
Экскурсияға Астана мен Қызылорда аймақтарынан келген балалар қатысты. Оларға киностудияның қызықтары ғана көрсетіліп қоймай, Шәкен Кенжетайұлы Аймановтың және отандық кинематографтың белгілі қайраткерлерінің өмірбаяндары айтылды. Балалар «Қазақ хандығы» тарихи хикаясындағы «Шайбаншах сарайы» декорациясын тамашалады. Ол жақта жобаның режиссері Рүстем Әбдірашев пен оператор Сапар Қойшыманов күтіп алды. Одан кейін «I’m a singer» тв-шоуының түсірілімі өтіп жатқан павильонға саяхат жасалды, сондай-ақ кішкентай қонақтарға анимация орталығында Қазақстан мультипликациясы туралы айтылды.
Шара қысқаметражды анимациялық таспалардың көрсетілімімен аяқталды. Жас қонақтарға сыйлық ретінде отандық киноның мэтрі Шәкен Аймановтың кинотаспалары басылған күйтабақтар берілді.
Айта кету керек, «Аман келешек» фестивалі – жыл сайын әр тақырып бойынша жұмыс істейтін ерекше шара. Фестивальге барлығы үш мың бала қатысты.
Суреттерді Ш. Айманов атындағы «Қазақфильм» АҚ баспасөз қызметі ұсынды
пікірлер жоқ, бірінші болыңыз
Пікір қалдыру үшін