Асқар Бисембин «Кинодан да артық» комедиясын түсіріп жатыр
Отандық режиссер Асқар Бисембин «Кинодан да артық» фильмінің түсіріліміне кірісті. Комедиялық таспа режиссердің жеке жобасы, оның негізіне кино мен кино қайраткерлері арқау болды.
Комедиядағы басты рөлдер Данияр Алшынов пен Аружан Жазылбековаға бұйырды. Данияр үшін бұл Бисембинмен бірігіп жасап жатқан алғашқы жұмысы және төртінші толық метрі. Актер бұрын «Аудандар», «Келін де адам баласы» және «Бәрі еркектердің кесірінен» фильмдеріне түскен болатын.
Кастинг-директор Марина Сүлейменованың айтуынша, сонымен қатар картинаға Әбунасыр Серіков, Әсел Сәдуақасова, Жәния Джуринская, Дәурен Айдарқұлов, Газрет Ержанов, Еркін Губашев пен Марат Достаев сынды актерлар қатысып жатыр. Аталмыш жобада Асқар Бисембиннің өзі де актерлік шеберлігін көрсетіп қалуы мүмкін.
Қоюшы-оператор ретінде Виктор Бормотов шақырылды, ол бұрын ресейлік «Интерны» және «Универ» хикаяларымен жұмыс істеген. 2017 жылы оператор «Бәрі еркектердің кесірінен» фильмінің режиссері ретінде дебюттік қадам жасаған. Картинадағы бейнелеу жұмыстарын қоюшы-суретші Рустам Мұсаевқа сеніп тапсырды.
Комедия түсірілімі Алматыда өтіп жатыр және тамыз айының 3-жұлдызына дейін жалғаспақ. «Кинодан да артық» фильмі экранға осы күзде жол тартады.
Суреттер Асқар Бисембиннің жеке Instagram парақшасынан алынды
пікірлер жоқ, бірінші болыңыз
Пікір қалдыру үшін