Асылхан Төлепов өзінің қандай жағдайда бақытты болатынын айтып берді
Асылхан Төлепов қайтадан толықметражды кинодағы басты рөлге ие болды. Актер режиссер Елена Лисасинаның «Қаржыгер. Шығу ойыны» атты дебютті картинасына түсіп жатыр. Асылхан қандай рөлді сомдайтынын, фильмнің көрермендерге несімен ұнайтынын «Бродвей» кинопорталына айтып берді.
«Бұл фильмде өзіндік ұстанымдары мен өмірде нақты мақсаты бар Руслан есімді жігітті сомдаймын. Екеуіміз негізі ұқсаймыз: ол ешқашан берілмейді, соңына дейін күреседі. Мен фильм сюжетін толық баяндап бере алмаймын, дегенмен көрермендерді тосын сыйға, шытырман оқиғаларға толы әсерлі картинаның күтіп тұрғандығын айта аламын»,-дейді Асылхан Төлепов.
Руслан - брокер, ол қомақты қаржы әлеміне еніп, кәсібінің тұңғиығына тап болады. Биржа саудасының барысында адам өмірін бағаламайтын біреулермен күреске түседі.
Авторлардың айтуынша, көрермендер түсінікті тілде қаржы әлемімен таныс болады.
Асылхан өзінің шығармашылық тұлғалығына қарамастан, бойында кәсіпкерлік қабілетінің барын алға тартты. Сондықтан, үнемі кірісі мен шығысын бақылап жүретінін айтты. Негізі, өмірлік қағидаларының арасында актер мамандығы бірінші орында тұрады екен.
«Жалпы, бақыт ақшада емес деп жатады ғой. Шынында да солай. Алайда, мына заманда қалтаңда бір тиының болмаса, күніңді көру қиын ғой. Кейбір адамдар тек бақытты болсақ болғаны, ақшаның да, материалды құндылықтың да қажеті жоқ деп жатады. Дегенмен, әркім өз бақытын өзінше саралайды. Біреулер үшін ол ақша шығар. Мен үшін бақыт – сүйікті ісіңмен айналысу, кинода және сахнада ойнау»,-деп бөлісті актер.
Фильмге Төлеповпен қатар, Шыңғыс Қапин, Карина Жұмалиева, Алдабек Шалбаев және Бақытжан Әлпейісов түсті.
Еске сала кетсек, «Қаржыгер. Шығу ойыны» фильмінің өндірісімен «Караван» кинокомпаниясы айналысуда. Жобаның бас продюсері - Ерболат Байғанин.
пікірлер жоқ, бірінші болыңыз
Пікір қалдыру үшін