«48 сағатта түсіру» байқауының Бас жүлдесін Қырғызстан тобы иеленді

4 Маусым, 2018
BrodKaz
959
0

«48 сағатта түсіру» (48 Hour Film Race) атты үшінші қысқаметражды фильмдер байқауы өз мәресіне жетті. Ұйымдастырушылар жеңімпаздарды жариялады. Қырғызстаннан шыққан Donsson Films тобы «Кет Out» картинасы үшін Гран-при жүлдесін қанжығаларына байлап қайтты.

«48 сағатта түсіру» байқауы Қазақстандағы АҚШ дипломатиялық уәкілдігімен жыл сайын өткізіліп келеді. Биылғы жылы кинокөрсетілім ауқымын кеңейтіп, Орта Азияның барлық тұрғындарын қатысуға шақырды. Қазақстан, Қырғызстан, Өзбекстан, Түркменстан және Тәжікстан сынды бес елден 1540 өтініш келіп түскен. Қатысушыларға 48 сағаттың ішінде төртминуттық қысқаметражды фильм түсіру керек болған. 334 топ талаптарды орындап, фильм түсірді. Алайда, олардың 48-і ғана финалға өтті.

Картиналарды сарапшы қазылар алқасы бағалады, олар нәтижесінде 10 аталым бойынша жеңімпаздарды анықтады: «Гран-при» - «Кет Out» (Donsson Films, Бішкек), «Үздік экшн» - «Гопництік рапсодия» фильмі (Yes-films, Алматы), «Үздік комедия» - «Байпақ» (Akorgo City, Бішкек), «Үздік драма» - «Өмір немесе өлім» (2.8 сом, Ақтөбе), «Үздік фантастика» - «Эдем» (Versare Creative, Бішкек), «Үздік мелодрама» - «Сөзсіз» (Digidoc, Алматы), «Үздік детектив» - «Ателье» (Cameramate, Алматы), «Үздік хоррор» - «Сыйлық» (Квентин Буратино, Алматы), «Технодом сыйлығы» - «Бақыт емес» (Анаморфий Рэддраганович, Алматы) және «Canon сыйлығы» - «Ағылшын сабақтары» (The Skeatles, Алматы).

Жеңімпаздарды салтанатты марапаттау рәсімі Алматыда, Chaplin MEGA Park кинотеатрында өтті.

Айта кету керек, байқау нәтижесін жарияламас бұрын үздік 48 фильм Шымкентте, Ақтөбеде, Өскеменде, Астанада, Қарағандыда және Бішкекте, Қырғызстанда көрсетілді.