II Республикалық «Байқоңыр» қысқаметражды кинофестивалі өтініштерді қабылдау мерзімін ұзартты
II Республикалық «Байқоңыр» қысқаметражды кинофестивалінің дирекциясы өтініштерді қабылдау мерзімін 20 тамызға дейін ұзартты. Байқауға қатысқысы келетіндер фестивальдің Baikonur.brod.kz ресми сайты арқылы өтініш бере алады.
Кинобайқауға 2016-2017 жылдары кез-келген жанрда шыққан, хронометражы 30 минуттан аспайтын қысқаметражды картиналар қатысады. Былтырғы «Байқоңыр» кинофестиваліне қатысқан фильмдер биыл қабылданбайды.
Барлық қатысушы-фильмдер үш бағыт: ойнамалы, деректі және анимациялық кино бойынша таныстырылады. Байқауға қатысушылардың жұмыстарын сараптамалық қазылар алқасы бағалайды. Қазылар алқасы ретінде Қазақстан кинематографистер Одағының төрағасы Ахат Ибраев, «Бастау» ХКФ президенті, режиссер әрі продюсер Сергей Азимов, «Қазақфильм» киностудиясының анимациялық цех жетекшісі Жәкен Дәненов, «Дебют» ШӨБ жетекшісі Анар Кашағанова және бірінші «Байқоңырдың» жеңімпазы Шарипа Оразбаева, сондай-ақ FIPRESCI және NETPAC, халықаралық кинофестивальдердің өкілдері арнайы шақырылды.
Жеңімпаздар келесі номинациялар бойынша анықталады: «Гран-при», «Үздік режиссер», «Үздік оператор», «Үздік қоюшы-суретші», «Үздік сценарий», «Үздік тәжірибелік фильм», «Үздік деректі фильм», «Үздік анимациялық фильм», «Үздік актриса», «Үздік актер» және «Қазылар алқасының арнайы жүлдесі».
II Республикалық «Байқоңыр» қысқаметражды кинофестивалі «Көк-Төбе» демалыс саябағында 15 қыркүйек күні басталады. Шара қонақтарына екі күн бойы қазақстандық кинематографистердің фильмдері көрсетілетін болады.
Кинофестиваль алғаш рет 2016 жылы өткізілген. Байқаудың басты мақсаты – жас дарындылардың негізгі алаңқайына айналып, отандық кинодағы жаңа есімдерді ашу. Шараның басты ұйымдастырушысы «Бродвей» кәсіби кинопорталы болып табылады.
пікірлер жоқ, бірінші болыңыз
Пікір қалдыру үшін