Ақан Сатаевтың «Она» фильмінің постері
Алдағы күзде айналымға Ақан Сатаевтың «Она» атты отандық фильмі жарыққа шықпақ. Өткен жолдары белгілі режиссердің жаңа картинасы көктемде көрсетіледі делінген еді.
«Она» фильмі – қалада тұратын жас бойжеткен мен кішкентай қыз туралы баяндайтын психологиялық триллер. Екі кейіпкер де әдеттегідей өмір сүреді: қалада қыдырады, мейрамханалар мен дүкендерді аралайды, өз істерімен айналысады. Бір қызығы, қалада олардан басқа ешкім жоқ. Бірақ, кейіннен қалада тағы біреу барын сезеді, күдіктенеді. Сонымен қатар, киноның «Жалғандықтың да шегі бар» деген ресми ұраны да қызықтыра түседі.
Фильмдегі басты кейіпкерлерді Айсұлу Әзімбаева мен Анастасия Вострова сомдайды. Айсұлудың айтуынша, оның кейіпкері – сыртқы әлеммен жұмысы жоқ өз-өздерімен болып қалған адамдардың жиынтық образы. Ол сондай-ақ, бұл жобаның триллер жанрындағы жаңа тәжірибесі болғандығын айтты.
Ақан Сатаев үшін бұл жанрда жұмыс істеу таңсық емес. Ол 2009 жылы Андрей Мерзликиннің басты рөлді сомдауымен «Адасқандар» триллерін түсірген.
«Она» туындысымен келесі шығармашылық топ жұмыс істеді: сценарий авторы Тимур Жақсылықов, қоюшы суретші Алексей Филимонов, қоюшы оператор Азамат Дулатов, сазгерлер Әлім Заиров пен Роман Вишневский, атқарушы продюсер Әлия Меңдіғожина және т.б.
пікірлер жоқ, бірінші болыңыз
Пікір қалдыру үшін