Санжар Омаров аналардың ауыр міндеті туралы «Ана жүрегі» атты хикая түсіруде
Алматыда «Ана жүрегі» атты жаңа хикая түсіріліп жатыр. Картина режиссері әрі сценарийдің қосалқы авторы - Санжар Омаров. Ол бұрын «Осындай Life», «ОрыStar әдісі» және «Үйленгендер» хикаяларын түсірген. Оның айтуынша, көрермендерді ананың ауыр әрі қызықты тағдыры күтіп тұрған көрінеді.
«Хикаяның сюжеті шынайы оқиғаға негізделген. Басты кейіпкер – тағдыры қиын 55-жасар сот қызметкері. Фильмде махаббат та, достық та, сатқындық та бар. Картина бір ғана қателіктің қымбатқа түсетінін, ойланбай жасаған бір әрекеттің салдарынан бірнеше тағдырдың шайқалуын көрсетеді. «Ана жүрегі» мен үшін – драма жанрындағы алғашқы жоба. Мен аталмыш жанрмен баяғыда жұмыс істегім келіп жүрген. Алайда, бес комедиялық картина түсірдім. Бұл жобаға мені продюсер Гүлнұр Мамасарипова шақырды. Осы кісі мені аталмыш хикаяны түсіруге шабыттандырды»,-деді Санжар Омаров.
Суреттер Санжар Омаровтың жеке Instagram парақшасынан алынды
Басты рөлді сомдайтын актрисаны Астанадан іздеді. Кастинг кезінде режиссердің таңдауы Лейла Ханинг-Бекназарға түсті. Басқа да негізгі кейіпкерлердің рөлдеріне Шәріп Серік, Жанель Мақажан, Олжас Тоғымбет және дебютті актриса Зируза Тасмағамбетова бекітілді.
Санжар Омаровтың айтуынша, сценарийді басында Азамат Каунев жазған. Бірақ оны жазу барысында серіктестікті тоқтатуға тура келеді. Содан кейін, сценарий жазуды режиссердің өзі қолға алды. Оған көмекке жас сценаристер Әсем Көбеева мен Батыр Ысқалиев келді.
«Ана жүрегі» фильмінің түсірілімі 6 маусымда басталып, Алматыда өтіп жатыр. Көпсериялы драманың өндірісімен «Хабар» агенттігінің тапсырысы бойынша «GG Cinema» студиясы айналысып жатыр.
пікірлер жоқ, бірінші болыңыз
Пікір қалдыру үшін