«Балуан Шолақ» фильмінің түсірілімі аяқталды
Режиссер Нұргелді Садығұлов «Балуан Шолақ» өмірбаяндық фильмінің түсірілімін аяқтады. Кинотаспа ҚР Мәдениет және спорт министрлігінің тапсырысы бойынша «Қазақфильм» киностудиясының қатысуымен түсірілген.
«Балуан Шолақ» фильмі әйгілі тұлға, күрескер, балуан әрі композитор Нұрмағамбет Баймырзаұлына арналған. Нұрмағамбет жастайынан тек физикалық қабілетімен ғана емес, білімқұмарлығымен, асқан ақылдылығымен ерекшеленді. Ол бір күні жәрмеңкеге келіп, күрестегі күшін байқап көреді де, табысқа жетеді. Содан бері қазақ балуаны туралы таңдай қақтырар сөздер бүкіл халық арасына жайылып кетті. Батыр Балуан Шолақты (саусақсыз балуан – ред.) оң қолындағы саусағы жоқ болғандықтан солай атап кеткен.
Көркем фильмнің түсірілімі 2017 жылдың маусым айының басында басталған. Картина Алматы облысындағы Кеген мен Жалаңаш ауылдарында және Павлодар мен Бурабай демалыс орталығында түсірілді. Түсірілімге Медғат Өмірәлиев, Александр Багрянцев және Жанел Мақажан сынды актерлар қатысты. Балуан Шолақты Еркебұлан Дайыров сомдады, ол осы рөл үшін 10 килограмм салмақ қосып, еркін күрес курсын бітірді.
Нұргелді Садығұловтың айтуынша, кинотаспаның жұмыстары ағымдағы жылдың соңында бітеді. Таспаның соңғы нұсқасын «Қазақфильм» киностудиясының Сарапшылар Кеңесі бағалайтын болады.
Суреттерді «Қазақфильм» АҚ баспасөз қызметі ұсынды
пікірлер жоқ, бірінші болыңыз
Пікір қалдыру үшін