«Абзал жан» хикаясының түсірілімі арнайы павильонда өтіп жатыр
Алматыда әйел дәрігері туралы «Абзал жан» хикаясының түсірілімі жалғасуда. Көпсериялы фильм бір айдай уақыт салынған арнайы павильонда түсіріліп жатыр. Оның декорациясымен қоюшы-суретші Назира Байбекованың жетекшілігіндегі кәсіби топ айналысты.
«Шынайы аурухана мекемелерінде түсіру мүмкін емес. Сондықтан, алғашында-ақ декорацияны өзіміз құрамыз деп шештік. Қысқа уақыттың ішінде ауруханаға ұқсас болып келетін ескі мектептің ғимаратын тауып алдық. Айтарлықтай өзгерту енгізе қоймадық: қабырға аралық терезелерді ғана орнаттық. Декорацияларды құру мен қажетті элементтерді таңдау оңай жұмыс емес. Ал бүкіл аурухананы жабдықтармен қамтамасыз ету тіпті қиын. Қажетті медициналық жабдықтарды барлық жерлерден іздедік. Ауруханалардан, ғаламтордан, қоймалардан кей заттарды жалға, кейбірін сатып алдық. Негізі, түсірілім тобы тізімнен шығып қалған техниканы пайдаланып отырды, сондықтан оларды бұрынғы қалпына қайта келтіруге тура келді»,-деді Назира Байбекова.
«Абзал жан» хикаясындағы оқиға қалалық аурухананың біріндегі босану бөлімінде өрбиді. Ол жақта дәрігер Абзал Смағұлов әріптестерімен бірге болашақ аналар мен сәбилердің денсаулығы үшін күреседі.
Түсірілім кезінде жаңа туған сәбилердің орнына резіңке қуыршақтар пайдаланылды. Авторлар оның айырмашылығын көрермендердің байқай да алмай қалатынын айтады. Себебі, қуыршақтар шынайы сәбилерге ұқсайды.
«Біз резіңкеден балалардың бейнесін жасайтын отандық және шетелдік гримерларды іздедік. Бірақ, қажетті маман таппағандықтан, бірнеше мүсіндерге интернет-дүкен арқылы тапсырыс бердік. Оларды бір айдан астам уақыт күтуге тура келді. Дегенмен, тапсырыстарымыз күтуге тұрарлықтай екен, себебі қуыршақтар силиконнан жасалғандықтан тірі сәбилерге қатты ұқсайды. Негізі, түсірілімдерге кәдімгі тірі сәбилерді пайдалану өте қауіпті, өйткені жұмыс ұзаққа созылып кетуі мүмкін. Кішкентай бала үшін бұл стресс болып табылады. Сондай-ақ, көптеген ата-аналар келісімдерін бермейді»,-деп түсіндірді қоюшы-суретші.
Түсірілімге барлығы 11 бөлме, кіре беріс және асхана пайдаланылды.
«Абзал жан» хикаясын «Хабар» телеарнасының тапсырысы бойынша режиссер Серікбол Өтепбергенов түсіріп жатыр. Мелодрама эфирге күзде шығады. Көрермендерге барлығы 32 бөлім ұсынылмақ.
Суреттерді «Хабар» телеарнасы ұсынды
пікірлер жоқ, бірінші болыңыз
Пікір қалдыру үшін