«Ninety One» бойз-бэнді туралы фильмнің түсірілімі басталды
Жақында режиссер Асқар Ұзабаев дәстүр бойынша тәрелке сындырып, «91» атты фильмнің түсірілімін бастап кетті. Белгілі болғандай, картина отандық Ninety One тобына арналған. Биографиялық таспаға продюсер ретінде Асқар Ұзабаев, Әсел Сәдуақасова және Ерболат Беделхан атсалысып жатыр.
«Біз атышулы «Ninety One» тобы туралы фильм түсірудеміз. Картинада бойз-бендтің солистері өздерін сомдайтын болады. Олар үшін бұл фильм киноға жасаған дебюттік қадамдары болайын деп тұр. Бұл жобаға ешқандай танымал актер қатыспайды. Музыкалық топ туралы фильм түсіріп жатқандықтан, кинода міндетті түрде әндер, хореография мен музыка болады. Жігіттердің жанкүйерлері таң қалатын болады деп ойлаймын»,- деді Асқар Ұзабаев.
Сюжет бойынша фильм бойз-бендтің басынан өткен оқиғалары, жігіттердің шығармашылық жолы мен түрлі кедергілері жайында болмақ. Фильм сценарийін Асқар Ұзабаев Сергей Литовченко мен бірігіп жазды.
Фильмнің қоюшы операторы - Азамат Дулатов.
Естеріңізге сала кетсек, «Ninety One» - отандық эстрадада Qazakh-pop секілді өзіндік стилі мен бағыты арқылы ерекшеленетін танымал топ. Жігіттерден құралған бұл топ 2015 жылы әнші әрі продюсер Ерболат Беделханның бастамасымен құрылған.
пікірлер жоқ, бірінші болыңыз
Пікір қалдыру үшін